Saraakiil loo xiray maxaabiistii ka baxsatay Xabsiga Dhexe ee Muqdisho
MUQDISHO, Soomaaliya – Saraakiil iyo askar ayaa xabsi loogu taxaabay saddex maxbuus, oo 29-kii December, sanadkii hore 2019, ka baxatay Xabsiga Dhexe ee Xamar, sidda uu ogaaday Garowe Online.
Illo wareedyo ayaa u sheegay warsidaha GO in shaqsiyaadka la xiray uu kamid yahay taliyaha ciidamada heeganka ku jiray xiliga ay maxaabiista baxsaneysay.
Jeelka oo ku yaala degmada Xamarwayne ayaa ah mid amnigiisa aad loo sugo, maadaama ay ku jiraan xubno loo xukumay dambiyo kala duwan oo ay kamid yihiin falal argagixiso.
Taliska guud ee Asluubta Soomaaliya ayaa diidey in uu fahfaahin buuxda ka bixiyo xariga saraakiisha iyo baaritaanka socda.
Maxaabiista baxsatay oo midkood laga soo qabtay Kawaanka Kaluunka degmadda Xamarwayne ayaa loo xukumay Al-Shabaabnimo.
Labadda maqan ayaa waxaa lagu waramayaa in midkood lagu xukumay xabsi daa'in, halka kan kale lagu ridday 10-sano oo xarig ah.
Baxsashadda ayaa timid maalin kadib qaraxii dhimashadda badan keenay ee isgoyska Ex-kontarool Afgooye, halkaasoo lagu khaariyey ku dhowaad 100 qof oo shacab u badan kuna dhaawacmeen 130 kale.
GAROWE ONLINE