Shuruudaha laga rabo murashaxiinta hogaanka Galmudug oo lasoo saarey
DHUUSAMAREEB, Galmudug - Guddiga doorashada madaxweynaha iyo ku xigeenkiisa ee baarlamaanka Galmudug ayaa soo saarey shuruudaha laga rabo murashaxiinta u tartameysa hogaanka maamulkaas.
Murashaxiinta u taagan xilka madaxweynaha ayaa laga doonayaan in ay bixiyaan 20-kun oo Doolar, halka ku xigeenada ay waajib tahay in ay dhiibaan tobban kun.
Shaacintaan ayaa kusoo aadeysa iyaddoo khilaafka dowladda iyo Ahlu Sunna ee quseeya hogaanka kooxda maamuleysa coddeynta uu gaarey meeshii ugu sareysay.
Ahlu Sunna oo xukuumadda ku eedeysay "in ay afduubatay doorashadii gudoonka baarlamaanka" ayaa ku dhawaaqay in aysan qayb ka ahayn doorashadda hogaanka labaad ee dowlad goboleedkaas.
Madaxweynaha iyo ku xigeenka Galmudug ayaa loo muddeeyay in la doorto 30-ka bishaan Janaayo ee sanadkan 2020-ka, sidda ku cad warqadda uu arkay Garowe Online.
Doorashada hogaanka guddiga ayaa dhacday iyaddoo uu jiro khilaaf u dhaxeeya dowladda iyo Ahlu Sunna oo ku saabsan in ururka uu majaraha u qabto kooxda maamuleysa cod-bixinta.
Ahlu Sunna oo wadar ahaan baarlamaanka labaad ee dowlad goboleedkaas ku leh 20 sharci-dejiye ayaa si gaar ah waxay Guddiga doorashadda ku leedahay lix xubnood.
Lixda Xildhibaan ee Ahlu Sunna oo shir jaraa'id ku qabtay magaaladda Dhuusamareeb ayaa ku cagajugleeyay in ay doorasho kale qaban doonan hadii aanan xal laga gaarin cabashadooda ka dhan ah dowladda.
Hoos ka akhriso qoraalka
GAROWE ONLINE