Taliyaha NISA ee gobolka Banaadir oo xilka laga qaadey
MUQDUSHU, Somalia - Waxaa maanta oo Sabti ah xilka laga xayuubiyay Taliyihii Nabada Sugida Gobolka Banaadir Cabdi Xakiim Fareey, xilli magaalada Muqdishu ka dhacayaan qaraxyo iyo dilal qorsheysan.
Maxamed Xasan Faarax (Faranfar), ayaa si rasmi ah loogu magacaabay Taliyaha Hay'adda Sirdoonka iyo Nabad Sugida gobolka Banaadir, waxaana mas'uulkaan cusub mudo kusoo dhex-jiray howlaha Sirdoonka.
Macluumaad hoose oo Warsidaha Garowe Online helay, ayaa sheegay sababta Xilka looga qaadey Cabdi Xakiim Fareey ay tahay inay isku Heeb (Qabiil) yihiin Jen Gaafow oo ah Taliyaha Guud ee Sirdoonka Somalia (NISA).
Madaxweyne Xasan Sheekh Maxa'uud, ayaa dhawaan soo saarey amar ah inaan wax Xilka ka qaadis ama magacaabis la samayn karin inta lagu guddo jiro marxalada kala guurka iyo Doorashooyinka 2016.
Hay'adda NISA ayaa yeelatay dhowr Taliye intii mudadii afarta sano ee uu xilka hayay Madaxweyne Xasan Sheekh, oo dhawaad (September 10) waqtigiisa sharciga ah uu ka dhamaaday.
GAROWEONLINE