Wariye lagu dilay duleedka Muqdisho iyo wararkii ugu dambeeyay
MUQDISHO, Soomaaliya - Dabley hubeysan ayaa wariye da'yar ku dishay Habeenkii Sabtida [27-ka October] degaanka Ceelasha Biyaha, ee duleedka magaalada Muqdisho.
Marxuumka oo lagu magacaabi jiray Cabdullaahi Mire Xaashi, ayaa waxa uu ka howlgali jiray Idaacad maxali ah, oo lagu magacaabo Daarul Sunna, oo laga dhageysto Ceelaha Biyaha iyo nawaaxigeeda.
Goobjooge la hadlay Warsidaha Garowe Online ayaa sheegay in wariyaha lagu dilay meel ku dhaw goobtiisa shaqada fiidnimadii sabtida, iyadoo kuwa falkan naxdinta leh fuliyay si nabad ah goobta uga baxsaday.
Degaanka Ceelaha Biyaha oo dhaca wadada Isku xirta Muqdisho iyo Afgooye ayaa waxaa gacanta ku haysa maamulkiisa dowladda Federaalka ah ee Soomaaliya, iyadoo AMISOM ay saldhig ku leedahay.
Lama oga sababta loo dilay suxufiga iyo cida dishy midna, balse waxa ay dhacdadan qeyb ka tahay dilalka iyo dhibaatooyinka kale ee dadka ka shaqeeya warbaahinta loogu geysto Soomaliya.
GAROWE ONLINE