Wasiirka Gaashaandhigga Soomaaliya oo is-casiley [Akhri Sababta]
MUQDISHO, Soomaaliya - Wasiirka Gaashaandhigga Xukuumadda Federaalka Soomaaliya, Maxamed Mursal Sheekh Cabdiraxmaan ayaa maanta shaaciyay inuu iska casiley xilka wasiir-nimo, oo loo magacaabay November 2017.
Wasiirka ayaa sheegay in sababta uu isku casiley ay tahay inuu u tartamo xilka Gudoomiyaha Gollaha Shacabka ee Baarlamaanka Federaalka Soomaaliya, waxaana warqadda Is-casilaadiisa u gudbiyay Ra'iisul Wasaare Khayre oo ka aqbalay.
Maxaamed Mursal oo sidoo kale ah Xildhibaan ayaa Warqada istiqaalada u gudbiyey Guddiga KMG ah ee doorashada Gudoomiyaha Gollaha Shacabka oo uu hogaamiye Nuur Iidow Beyle.
Is-casilaadiisa ayaa ka dambaysay kadib markii Gudiiga doorashada uu ku xiray Wasiirada doonaya inay u tartamaan xilka Afhayeenka Baarlamaanka inay marka hore xilalka wasiir-nimo iska-casilaan, si ay tartanka doorashada uga qeyb-galaan.
Wasiirka Biyaha iyo Tamarta, Saalim Caliyow Ibrow, Wasiiru dowlaha Wasaaradda Ganacsiga iyo Wershadaha, Cabdicasiis Xasan Maxamed [Lafta Gareen] iyo ku xigeenka Wasiirka Boostada iyo Isgaarsiinta, Ibraahim Isxaaq Yarow ayaa shalay is-casiley, kuna biiray Musharaxiinta.
Lix Musharax ayaa ilaa hadda la diiwaangeliyay, kuwaasi oo wasiiro iyo ku xigeenno ay kamid yihiin, waxaana Gudiga doorashada uu maanta soo gaba-gabeynayaa howsha diiwaan-gelinta. Halkan ka akhri warka.
GAROWE ONLINE