Xasan Sheekh oo ololihiisa Doorashada u tagey Kismaayo
-
- Posted On 05-12-2016, 02:45PM
KISMAYO, Somalia- Madaxweynaha waqtigiisu dhammaaday ee Somalia, Xasan Sheekh Maxa'uud iyo wafdi uu hogaaminayo ayaa maanta gaarey magaalada Kismaayo, ee xarunta maamulka Jubbaland.
Mas'uuliyiin uu kamid yahay Madaxweynaha Jubbaland Axmed Madoobe, ayaa xubnahaas kusoo dhaweeyay Garoonka Diyaaradaha Kismaayo, iyadoo amniga magaalada aad loo adkeeyay.
Ujeedka Xasan Sheekh uu u tagey Kismaayo ayaa la xiriirta Ololihiisa Doorashada, maadaama xildhibaanada Aqalka sare iyo mid Hoose ee Jubbaland noqdeen kuwii ugu horeeyay oo ee la doortay.
Labadaas mas'uul ayaa warbaahinta si wadajir ah ugula hadlay magaalada Kismayo. Xasan Sheekh ayaa soo dhaweeyay dadaalka maamulkaas u galay doorashada labada Aqal, sidoo kale wuxuu ku ammaanay hormarka ay gaareen mudadii uu jiray maamulkaas.
Safarka MD Xasan Sheekh ayaa yimid maalmo kadib markii uu Cumar Cabdirashiid, sidan oo kale u tagey magaaladaasi, isagoo dhaliilay maamulka hadda jira islamarkaana Xildhibaanada ku wargaliyay in dalka Somalia isbadal u baahanyahay.
Musharaxiin badan, oo u tartamaya Xilka Madaxweyne ayaa sidoo kale ku sugan Kismaayo, iyagoo kulamo la qaadanaya Xildhibaanada lagu doortay magaaladaasi, si codadkooda u iibsadaan.
Dhanka kale, Madaxweyne Axmed Madoobe ayaa lagu soo waramayaa inuu diiday saxiixa Liiska Xildhibaanada Labada Aqal, si loogu sameeyo Kaararka Aqoonsiga Xildhibaanimo.
Lama oga sababta ka dambaysa inuu Axmed Madoobe diido tallaabadaas, balse warar hoose oo aan la xaqiijin ayaa sheegay inuu madaxweynaha Jubbaland ku dooday in la xalliyo tabashooyinka Puntland si uu u ansixiyo.
GAROWEONLINE
