Maamulka Somaliland oo digniin u diray Beesha Caalamka

HARGEYSA, Somaliland - Somaliland oo war-saxaafadeed soo saartey ayaa waxay Beesha Caalamka kaga digtay "talaabooyinka lagu wiiqayo xasiloonida iyo dimuqraadiyadda" maamulkaas.

Sidda ku xusan war-saxaafadeed kasoo baxay Wasaaradda Arrimaha Dibadda maamulka Hargeysa, waxay cabasho ka yihiin qoraal dhowaan kasoo baxay Saaxiibadda Aduunka.

Si gaar ah waxay ashtakadda quseysaa dhanka doorashooyinka Soomaaliya gaar ahaan qoondada kuraasta degaan doorashadoodu tahay degaanadda maamulka Somaliland.

Qoraalka oo nuqul kamid ah uu helay Garowe Online ayaa lagu caddeeyay in Somaliland aysan qeyb ka ahayn doorashooyinka Soomaaliya qorshuhu yahay in ay ka dhacaan 2020-21.

"Sidoo kale, Somaliland waxay aaminsan tahay in isku day kasta oo arrintaan la xiriirta ay gobolka u keeni karto cawaaqib xumo siyaasadeed iyo mid amni," ayaa lagu soo xiray bayaanka.

Daneeyeyaasha dunida ayaa ku baaqay in doorashooyinka Soomaaliya ee sanadka dambe ay waqtigooda ku dhacaan, taasoo meesha ka saareysa muddo kororsi laga digayo.

Somaliland ayaa madaxbanaani dooneysa tan iyo 1991-dii, balse wali aqoonsi kama helin caalamka. Xildhibaanada ku metela baarlamaanka Soomaaliya waxaa lagu doortaa magaalada Muqdisho.

Hoos ka akhriso qoraalka

GAROWE ONLINE