Maxaa looga hadlay kulanka Muuse Biixi Cabdi iyo safiirka Denmark?

Somaliland
By WARIYAHA HARGEYSA , GAROWE ONLINE
Madaxtooyada Somaliland ayaa sharaxaad ka bixisay qodobada looga hadlay shirka.

HARGEYSA, Somaliland - Madaxweyne Muuse Biixi Cabdi ayaa qaabiley safiirka Denmark u qaabilsan Soomaaliya Amb. Mette Knudsen oo uu wehliyo ku xigeenkeedu Nina Berg.

Madaxtooyada Somaliland ayaa sheegtay in kulanka diirada lagu saarey mashaariicda horumarinta iyo doorashooyinka dib-u-dhacyadu hareeyeen ee maamulka Hargeysa.

Wararka ayaa sheegaya in shirka lagu soo qaadey wada-xaajoodyadda hakadka ku jira ee dowladda Soomaaliya iyo Somaliland oo qorshuhu ahaa in dib loo bilaabo.

Beesha Caalamka ayaa lagu waramayaa in ay dedaal badan gelineyso sidii dhinacyada miiska wada-hadalka isugu imaan lahaayeen, mustaqbalka dhow.

Hogaanka dowlada federaalka iyo Somaliland oo ku celceliyay in ay diyaar u yihiin wadahadalka ayaanan qaadin talaabo dhaafsiisan hadalkooda.

"Ugu danbayntiina waxa kulankaa lagu soo qaaday nabadgelyada mandaqada geeska Afrika sidii loo adkayn lahaa loogana wada socon lahaa," ayaa lagu yiri war-saxaafadeedka.

Madaxweyne Ku xigeenka Somaliland, Cabdiraxmaan Cabdilaahi Ismaaciil iyo wasiiro ka tirsan xukuumadda Biixi ayaa kasoo muuqday kulanka oo dibadjoog ka ahayd saxaafada.

GAROWE ONLINE

Wararkii ugu dambeeyey