Somaliland oo Jawaab Culus u dirtay Xukuumadda Soomaaliya [Daawo]

Somaliland
By Wariyaha Hargeysa , Garowe Online
Muuse Biixi Cabdi, Madaxweynaha Somaliland

HARGEYSA, Somaliland – Madaxweynaha maamulka Somaliland Muuse Biixi Cabdi ayaa ka jawaabay go’aankii uu Ra’iisul Wasaare Xasan Cali Khayre uu sharci darrada ugu tilmaamay Heshiiskii Dekedda Berbera.

Isagoo ka hadlayay Munaasabad lagu xusayay 8-da Maarso oo ka dhacday Hargeysa, ayaa Madaxweyne Muuse Biixi sheegay in Ra’iisul Wasaare Khayre uu iclaamiyay dagaal ka dhan ah Somaliland.

Wuxuu xusay Muuse Biixi in Somaliland ay iska difaacayso duulaanka ay kusoo qaadey dowladda Federaalka Soomaaliya kaasi oo ka dambeeyay heshiiska maalgashiga ee ay la galeen DP World ee laga leeyahay UAE.

Madaxweyne Muuse ayaa si adag u difaacay heshiiska Berbera, kaasi oo Itoobiya ay qeyb ka yahay, isagoo xusay in maamulkiisa oo kaliya uu xaq u leeyahay go’aanka Heshiiska, islamarkaana cidna kala tashaneynin.

Ra’iisul Wasaare Xasan Cali Khayre iyo Wasaaradda Dakadaha iyo Gaadiidka Badda Soomaaliya ayaa si isku mid ah uga soo horjeestay Heshiiska Somaliland iyo DP World, iyagoo ku tilmaamay mid sharci darro ah. Halkan ka Daawo.

Dowladda Federaalka Soomaaliya ayaa sheegtay in aysan waxba kala socon Heshiiska saddex geesoodka Berbera ee Somaliland, DP World iyo Itoobiya, waxaana ay shaacisay in heshiisyada noocan ah ay iyada oo kaliya dastuurka awood u siinayo inay saxiixdo.

Shirkadda DP World ayaa dhawaan shaacisay in go'aanka dowladda Federaalka aysan waxba ka bedeli karin Heshiiska ay la gashay Somaliland, maadaama heshiiskooda uu meel mariyay Baarlamaanka Somaliland 2016-kii.

Hoos ka daawo khudbadda Madaxweyne Muuse Biixi:

GAROWE ONLINE

 

Wararkii ugu dambeeyey