Somaliland oo si kulul uga jawaabtay hadal kasoo yeeray Mustafa Cagjar

HARGEYSA, Somaliland - Wasiirka Arrimaha Dibadda ee Somaliland, Yaasiin Xaaji Maxamuud Xiir [Faratoon], ayaa ka jawaabay hadal dhowaan kasoo yeeray Madaxwaynaha dowlad degaanka Soomaalida, Mustafa Maxamed Cumar [Cagjar].

Cagjar ayaa sheegay in degaanada Soomaalida ee xuduudka la leh dowlada Itoobiya – si gaar ah Somaliland iyo Jubbaland – ay ku dhuumaaleysanayaa xubno dambiyo kasoo galay shacabka degaanka.

Madaxwaynaha oo hadalkiisa sii wata wuxuu shaaca ka qaaday sidoo kale in shaqsiyaadkiisa ay soo abaabulayaan falal liddi ku ah amniga, isaga oo wacad ku maray inay gacanta kusoo dhigi doonan.

Faratoon oo war-fidiyeenka u waramay oo arrintaasi ka jawaabaya ayaa dhinaca uga leexiyay maamulkiisa, isaga oo xusay inaanu jirin masuuliyiin degaanka kasoo jeedo oo dhulka Somaliland maamusho ku sugan.

Wasiirka ayaa wuxuu su’aal geliyay xaqiiqo ahaanshiyaha hadalka kasoo yeeray Mustafa Cagjar, kaasi oo uu ku tilmaamay “mid ubaahnaan lahaa in la hubiyo kahor inta aanan shacabka lala wadaagin”.

Horaantii sanadkaan ayay ahayd markii uu is-bedalku ka dhacay ismaamulka Soomaali Galbeed, oo ay shaacisay Somaliland inay jiraan wasiiro xuduudka kasoo gudbay, kuwaasi oo kolkii dambe la xiray.

Madaxwayne Muuse Biixi Cabdi, ayaa dhowr jeer faray hay’addaha nabad-gelyadda inay sugaan amniga xuduudka, islamarkaana ay gacan bir ah ku qabtaan xubnaha dhinaca Itoobiya kasoo galaya.

GAROWE ONLINE