Xildhibaan sheegey in Puntland iyo Jubaland aqbaleen 4.5 [Dhageyso]
-
- Posted On 17-01-2016, 09:38PM
KISMAYO, 18 Jan, 2016- Xildhibaan Cabdiwahab Ugaas Xuseen oo la hadley Idaacada Radio Garowe ayaa sheegey in dowlada Puntand iyo Jubaland fikir ahaan aqbaleen in aqalka hoose ee Barlamanka dowlada Federaalka lagu soo xulo 4.5.
Cabdiwahab Ugaas Xuseen oo ka tirsan Barlamanka dowlada Federaalka islamarkaana ku sugnaa madasha shirka magaalada Kismayo ayaa sheegey in maamulka Galmudug iyo Koonfur Galbed ay diideen in aqalka sare lagu soo xulo nidaamka degmooyinka iyagoo dalbadey in labada aqalba Barlamankooda noqdaan kuwa 4.5 lagu keeno.
Mudanahaan ayaa sheegey in sababta shirka la burburey tahay kadib markii Galmudug iyo Koonfur Galbeed tanaasul ka sameyn waayeen mowqifkooda ku aadan 4.5 in lagu soo xulo dhamaan xildhibanada Barlamanka.
Warsidaha Garowe Online ayaa horey u shaaciyey in is-afgaran waaga kulankan uu salka ku hayey in maamulada Puntland iyo Jubaland diideen in aqalka hoose iyo sare lagu soo xulo nidaamka 4.5 halka maamulada kale dhinaca kale istaageen balse xildhibanakaan ayaa shaaca ka qaadey xog ka duwan arimaha la isku hayey.
Ma jiro warsaxafdeed rasmiya oo kasoo baxey dhinacyada kulanka uga socdey magaalada Kismayo oo la xiriira arrimaha la isku af-garan waayey marka laga reebo Railsal wasaraha Somalia oo hadal kooban jeediyey markii uu ka dhoofayey xarunta Jubaland.
GAROWEONLINE
