Madaxweynaha HirShabeelle oo gobolka Hiiraan ka sameeyay Maxkamad Islaami ah
-
- Posted On 24-07-2017, 07:37PM
BALADWEYNE, Hiiraan- Madaxweynaha maamulka HirShabeelle, Cali Cabdullaahi Cosoble ayaa soo saaray wareegtooyin labo ah oo maxkamado Islaami ah loogu samayay gobolka Hiiraan iyo degmada Baladweyne ee caasumadda gobolkaas.
Qoraal maanta kasoo baxay xafiiska Madaxweyne Cosoble, ayaa lagu sheegay in xalka gobolka iyo degmada loo arkay in la sameeyo maxkamad Islaami ah si loo helo Garsoor caadil ah oo wax ka qabta khilaafaadka daba dheeraaday ee ka dhex aloosan shacabka reer Hiiraan.
Samaynta Maxkmaddan ayaa Madaxweynuhu sheegay inuu u cuskaday rabitaan ka yimid shacabka iyo talo soo jeedin uu sameeyay wasiirka Garsoorka maamulka HirShabeelle.
Maxkamadda Racfaanka ee loo sameeyay gobolka Hiiraan, waxaa Guddoomiye looga dhigay Sh. Ibraahim Xasan Cali, kaasoo lagu lammaaniyay Labo Garsoore iyo hal Kaaliye.
Dhinaca kale Maxkamadda degmada Baladweyne ee xarunta gobolka Hiiraan, waxaa Guddoomiye looga dhigay Sh. Roobe Yuusuf Nuur, waxaana lagu lammaaniyay, Labo Garsoore, Labo Kaaliye, Gaarsiiye iyo Agaasimaha Gal-dacwadeedka.
Waxaa lagusoo aadiyay xilli maxkamado dowladdi iyo madani isugu jira ay ka jireen gobolka Hiiraan.
Ilaa hadda arrintan kama aysan hadlin shacabka reer Hiiraan iyo degmada Baladweyne siday u arkaan, balse waxay kusoo aaday xilli inta badan xarunta gobolkaas ay ka dhacaan dagaallo la xariira murano ka dhasha daaqsinka, dhulka iyo anooyin Qabiil oo muddo soo noq-noqday.
Lama oga in arrintan wax ka badali doonto xaaladda gobolka Hiiraan.
GAROWEONLINE
