​28 ku dhintay weerar ka dhacay Kabul

KABUL- Maleeshiyo ka tirsan kooxda Daalibaan ayaa weerar qaraxyo iyo rasaas isugu jira maanta ka fuliyey magaalada Kabul ee xarunta waddanka Afghanistan, waxa ay ku dileen ugu yaraan 28 qof, ayagoo dhaawacay in ka badan 327, sida ay sheegeen booliiska iyo saraakiil caafimaad.

Weerarka, waxaa lagu qaaday dhisme ay daganaayeen saraakiil katirsan ciidamada gaarka ah iyo kuwa sirdoonka, waxaana wehelinayay ciidamo qaabilsan sugidda amniga saraakiisha dowladda.

Saraakiisha ayaa sheegay in markaa kadib ay xigtay dagaal ka dhex qarxay kooxda weerarka soo qaaday iyo ciidamada amniga, kaasi oo socda dhowr saacadood, islamarkaana ay ku dhinteen dhammaan kooxdii weerarka soo qaaday oo qarakood ay is-qarxiyeen.

Falkan, waxaa fuliyay ruux isku soo xiray walxaha qarxa isagoo abaaray albaalka xarunta laga galo.

Dhacdadan, waxaa sheegatay kooxda Daalibaan, iyagoo ku qoray baraha taageera inay weerarkaasi la beegsadeen saraakiil dowladda katirsan.

Arrintan saamaynteeda ayaa laga dareemaya magalada Kabul, waxaana goob jooge la hadlay warbaahinta caalamka uu sheegay inuu arkay maydka askar katirsan dowaldda iyo dad shacab ah kuwaasi oo waxyeello kasoo gaartay qarax iyo rasaas labada dhinac isweydaarsadeen.

Madaxweynaha dalka Afghanistan Ashraf Ghani ayaa weerarka cambaareeyey, wuxuuna sheegay in dad badan lagu dilay ama lagu dhaawacay.

Kooxdan dagaalka kula jirta ciidamada dowladda ayaa inta badan weeraro ismiidaamin iyo qaraxyo kale isugu jira ka gaystay magaalooyinka waaweyn ee dalkaasi, waxayna xoojiyay sannadkan kadib markii uu xoogaystay xiriirka Afghanistaan la leedahay waddamada reer Galbeedka.

GAROWEONLINE