Canada oo Mareykanka Ka Dalbatay Ixtiraamka Madaxbannaanideeda

Ra’iisul Wasaaraha Canada, Mark Carney, ayaa sheegay in uu ka filayo dowladda Mareykanka in ay ixtiraamto madaxbannaanida Canada, kaddib markii warar soo baxeen tilmaamaya in kooxo ka tirsan dhaqdhaqaaqa kala-go’a ee gobolka Alberta ay dhowr jeer la kulmeen masuuliyiin ka tirsan maamulka Madaxweyne Donald Trump.

Warbixin ay baahisay Financial Times ayaa sheegtay in saraakiil ka tirsan Wasaaradda Arrimaha Dibadda ee Mareykanka ay la kulmeen urur lagu magacaabo Alberta Prosperity Project (APP), kaas oo ku baaqaya afti lagu go’aaminayo in gobolka Alberta, oo hodan ku ah kheyraadka tamarta, uu ka go’o Canada.

Isagoo ka hadlayay magaalada Ottawa, Carney ayaa sheegay in uu arrintan si toos ah ula wadaagay Madaxweyne Trump, islamarkaana uu caddeeyay in Canada ay ka filayso Mareykanka ixtiraam buuxa oo ku saabsan madax-bannaanida iyo arrimaheeda gudaha. Wuxuu intaas ku daray in labada dal ay diiradda saaraan meelaha ay iska kaashan karaan.

Gobolka Alberta, oo Carney asal ahaan ka soo jeedo, ayaa muddo dheer lahaa dhaqdhaqaaqyo ku baaqaya is-maamul ama kala-go’. Madaxweyne Trump ayaa dhowr jeer si kaftan iyo hadal siyaasadeed isugu jira u sheegay in Canada ay noqon karto “gobolka 51-aad” ee Mareykanka, taas oo walaac ku abuurtay siyaasiyiinta Ottawa.

Wararku waxay tilmaamayaan in hoggaamiyeyaasha APP ay ugu yaraan saddex jeer kula kulmeen saraakiil Mareykan ah magaalada Washington tan iyo bishii April ee la soo dhaafay. Arrintan ayaa keentay walaac la xiriira suurtagalnimada faragelin dibadeed oo ku timaadda siyaasadda gudaha ee Canada.

Dhinaca kale, Wasiirka Maaliyadda Mareykanka, Scott Bessent, ayaa dhawaan ku tilmaamay Alberta “lamaane dabiici ah” oo uu Mareykanku la shaqeyn karo, isagoo amaanay kheyraadka dabiiciga ah ee gobolka iyo dabeecaddiisa “madaxbannaanida u janjeerta”. Hadalkaas kaddib, hoggaamiyeyaasha APP ayaa sheegay inay doonayaan kulan kale oo ay la yeeshaan saraakiisha Mareykanka, si ay ugala hadlaan taageero dhaqaale oo suurtagal ah haddii mustaqbalka la qabto afti ku saabsan madaxbannaanida Alberta.

Arrintan ayaa imanaysa xilli xiriirka ganacsi iyo siyaasadeed ee u dhexeeya Canada iyo Mareykanka uu marayo marxalad xasaasi ah, kaddib hadallo Carney uu ka jeediyay Madasha Dhaqaalaha Adduunka ee Davos, halkaas oo uu ku sheegay in isbeddellada Washington ay saameyn ku leeyihiin nidaamka caalamiga ah.

Hoggaamiyeyaasha gobollada Canada ayaa si kala duwan uga falceliyay wararka. Ra’iisul Wasaaraha British Columbia, David Eby, ayaa ku tilmaamay kulamadaas “fal khatar ku ah midnimada dalka”, isagoo sheegay in caawimaad dibadeed loo raadsado kala-dirista Canada ay tahay arrin aan la aqbali karin.

Ra’iisul Wasaaraha Ontario, Doug Ford, ayaa ku baaqay midnimo qaran, isagoo xusay in Canada ay u baahan tahay in ay “isku duubnaato” si ay uga gudubto khilaafaadka gudaha iyo cadaadiska dibadda.

Dhanka kale, Ra’iisul Wasaaraha Alberta, Danielle Smith, ayaa sheegtay in aysan doonayn in ay cambaareyso muwaadiniinta ka hadlaya kala-go’ sabab la xiriirta cabashooyin ay ka qabaan dowladda dhexe ee Ottawa, iyadoo ku tilmaantay arrintaas mid ka tarjumaysa dareenno jira oo bulshada ka dhex jira. Smith, oo horey u muujisay taageero siyaasadeed oo u janjeerta dhinaca Trump, ayaa bishii Janaayo booqatay xaruntiisa Mar-a-Lago, xilli hoggaamiyeyaal kale oo Canadian ah ay si wadajir ah uga soo horjeedeen hadallada Trump ee ku saabsan mustaqbalka Canada.

GAROWE ONLINE