Dadka Sudan oo dooranaya madaxweyne cusub iyo barlamaan
-
- Posted On 13-04-2015, 04:15AM
April 13, 2015 (GO)- Dadweynaha dalka Sudan ayaa maanta u dareeraya goobaha cod bixinta si ay usoo doortaan madaxweyne cusub iyo xildhibaannada golaha guurtida iyo wakiillada.
Doorashadan oo ah tii ugu horreysey laga soo bilaabo markii Kooonfurta Sudan ka go'dey dalka Sudan, waxaa qaadacay inta badan axsaabta mucaaradka.
Mucaaradka ayaa ku dhaleecaynaya dowladda Madaxweyne Cumar Xasan Al-bashiir hoggaamiyo inay caburin ku hayso siyaasiyiinta mucaaradka iyo warbaahinta suuragalna ay tahay in doorashada lagu shubto.
Guddiga doorashada madaxa bannaan ee Sudan ayaa sheegay in dadka is diiwaan geliyey si ay doorashada uga qayb galaan tiradoodu gaareyso saddex iyo toban milyan.
Goobaha cod bixinta waxaa si rasmi ah loo furayaa 8:00 subaxnimo, waxayna doorashadu socon doontaa muddo saddex maalmood ah. Natiijada waxaa la shaacin doonaa 27-da bishan April.
Doorashadan waxaa ku tartamaya lix iyo toban murashax, waxaana ugu cadcad Madaxweyne Cumar Xasan Al-bashiir oo isagu dalka Sudan soo hoggaaminayey laga soo bilaabo sanadkii 1989.
GAROWE ONLINE
