Manchester City oo jabisay xeerka Premier League kadib guushii Anfield

LIVERPOO (GO) - Kooxda Manchester City ayaa lagu soo waramayaa inay ku xadgudubtay shuruucda baahinta wararka horyaalka Premier League, kadib markii ay diiday in tababaraheeda Enzo Maresca uu la hadlo idaacadaha (Radio) ciyaartii ay 3-0 kaga adkaadeen Liverpool ee ka dhacday garoonka Anfield.

Sida uu tebiyay wariyaha caanka ah ee talkSPORT Alex Crook, saraakiisha Manchester City ayaa u diiday wariyeyaasha idaacadaha rasmiga ah ee heysta xuquuqda baahinta inay wareystaan Maresca. Talaabadan ayaa timid inkasta oo tababaruhu uu qabtay wareysiyadii tooska ahaa ee telefishinka Sky Sports uuna ka qayb galay shirka jara'id ee qoraalka ahaa. 

Diidmadani waxay si toos ah uga hor imaanaysaa xeerka baahinta warbaahinta ee Rule K.207 ee buug-gacmeedka Premier League, kaasoo ku waajibinaya kooxaha martida iyo kuwa martida loo yahay inay maamulayaashooda wareysi siiyaan na warbaahinta shatiga u heysata baahinta kulamada, oo ay ku jiraan idaacadaha sida BBC Radio 5 Live iyo talkSPORT.

Kulankan ayaa ku soo beegmay xilli xaalad adag ay ka dhex jirtay taageerayaasha Liverpool iyo Manchester City, kadib go’aankii dhowaan soo baxay ee kooxda City lagu helay 114 xadgudub oo la xiriira xeerarka maaliyadeed ee horyaalka. Taageerayaasha Liverpool ayaa garoonka ku soo bandhigay boorar iyo heeso cambaareyn ah oo ka dhan ah kooxda martida ahayd.

Sababta rasmiga ah ee maamulka City u cuskadeen tallaabadan ayaan la shaacin, balse wararka qaar ayaa sheegaya in kooxdu doonaysay inay ka fogaato su'aalo dheeraad ah oo ku saabsan ganaaxyada suurtagalka ah ee ka dhalan kara kiiska maaliyadeed.

Ku xadgudubka xeerarka noocan ah ma keeno ciqaab dhanka dhibcaha garoonka ah (points deduction), balse Premier League ayaa la filayaa inuu kooxda u diro digniin rasmi ah ama uu ku soo rogo ganaax lacageed oo maamul.

GAROWE ONLINE