Maraykanka oo Bilaabay Ballaarinta Saldhigga Manda Bay Kadib Weerarkii Al-Shabaab ee 2020

NAIROBI, Kenya — Maraykanka ayaa bilaabay mashruuc ballaarin ah oo ku kacaya $70 milyan si loo casriyeeyo una loo ballaariyo garoon diyaaradeed oo ku yaalla saldhig ciidan oo ku dhow xadka Soomaaliya, tallaabo lagu xoojinayo dagaalka ka dhanka ah argagixisada Geeska Afrika.

Mashruucan ayaa ka socda Saldhigga Cirka ee Manda Bay, oo hoos yimaada Ciidamada Difaaca Kenya, kuna yaalla ismaamulka Lamu, halkaas oo ay si joogto ah uga howlgalaan ciidamo Maraykan ah. Saldhiggan ayaa muddo dheer ahaa xarun istiraatiiji ah oo lagu beegsado kooxda Al-Shabaab ee xiriirka la leh Al-Qaacidda.

Ku-xigeenka Xoghayaha Arrimaha Dibadda ee Maraykanka, Christopher Landau, ayaa ka hadlay munaasabad lagu dhagax-dhigay mashruuca Khamiistii, isagoo sheegay in ballaarintu ay muujinayso go’aanka Washington ee difaaca wadajirka ah ee ay la leedahay Kenya.

“Waa inaan u muujinno kuwa doonaya inay na waxyeelleeyaan inaan ka go’an tahay inaan is difaacno,” ayuu yiri Landau, isagoo ku tilmaamay saldhigga Manda Bay “calaamad cad oo muujinaysa difaaca wadajirka ah ee Maraykanka iyo Kenya.”

Mashruuca ayaa imanaya xilli ay sii xoogeysanayaan xiriirrada milatari iyo diblomaasiyadeed ee labada dal. Sannadkii 2024, madaxweynihii hore ee Maraykanka Joe Biden ayaa ku dhawaaqay qorshe Kenya loogu aqoonsanayo xulafada weyn ee aan NATO ka tirsanayn ee ugu horreysa ee Maraykanka ee Afrikada Saxaraha ka hooseysa, si loo xoojiyo iskaashiga amniga inkasta oo uusan jirin heshiis amni oo rasmi ah.

Manda Bay ayaa door muhiim ah ka qaadatay howlgallada Maraykanka ee ka dhanka ah Al-Shabaab, oo weerarro ka fulisay Kenya iyo Soomaaliya. Sannadkii 2020, saddex Maraykan ah ayaa lagu dilay kadib markii Al-Shabaab ay jebisay amniga Camp Simba, oo ka tirsan saldhigga Manda Bay, halkaas oo lagu burburiyay diyaarado iyo gaadiid milatari.

Kenya ayaa horey u wajahday weerarro argagixiso oo lala xiriiriyay Al-Qaacidda. 1998, qaraxyo is-xigay oo lagu beegsaday safaaradaha Maraykanka ee Kenya iyo Tanzania ayaa dilay in ka badan 200 qof, oo ay ku jireen 12 Maraykan ah, halka kumannaan kalena ay ku dhaawacmeen.

Landau ayaa sidoo kale bogaadiyay doorka Kenya ee dadaallada caalamiga ah ee xasillinta, oo ay ku jirto ka-qaybgalkeeda hawlgallada taageerada amniga ee Haiti.

GAROWE ONLINE