Midowga Yurub oo Google ku ganaaxay $3.5 bilyan; Trump oo cambaareeyay

BRUSSELS — Guddiga Midowga Yurub ayaa Jimcihii ku riday shirkadda Google ganaax dhan 2.95 bilyan euro ($3.5 bilyan), kaddib markii lagu helay in ay ku xadgudubtay sharciga tartanka suuqyada ee Yurub, iyadoo si gaar ah uga hormarisay adeegyada xayaysiinta dhijitaalka ah ee ay iyadu leedahay.

Guddiga Midowga Yurub, oo ah hay’adda ugu sarreysa ee u xilsaaran la-dagaallanka tartan xumada, ayaa sheegay in Google ay “si xadgudub ah” ugu faa’iidaysatay awooddeeda suuqeed, ayna takoor u samaysay shirkado kale, xayeysiiyayaal iyo warbaahinba.

Go’aankan ayaa ah kii afraad ee ganaax bilyan euro ah oo Google lagu xukumo tan iyo 2017, waana tallaabo ka mid ah ol’ole ballaaran oo Midowga Yurub ku xakameynayo shirkadaha waaweyn ee tiknoolajiyadda.

Madaxweynihii hore ee Mareykanka, Donald Trump, ayaa si kulul uga falceliyay go’aanka, isagoo ku tilmaamay mid “aad u cadaalad darro ah” oo weerar ku ah hal-abuurka Mareykanka iyo shaqooyinka muwaadiniinta.

“Cadaalad darro buuxda ah! Canshuur bixiyeyaasha Mareykanka arrintan ma aqbali doonaan!” ayuu Trump ku qoray baraha bulshada ee Truth Social. “Maamulkeygu marnaba ogolaan maayo falalkan takooridda ah.”

Trump ayaa intaas ku daray in Midowga Yurub uu “qaadanayo lacago Mareykanka u ah, oo ku bixi lahaa maalgelin iyo shaqo abuur gudaha Mareykanka.”

Baaritaanka EU-da ayaa diiradda saaray AdX Exchange iyo DFP ad server, oo ah aalado Google leedahay oo isugu xira xayeysiiyeyaasha iyo bogagga warbaahinta. Guddigu wuxuu sheegay in tan iyo 2014, Google si qaldan ugu adeegsatay labada dhinac ee suuqan si ay tartanka u xannibto una hormariso adeeggeeda.

Guddiga ayaa Google siiyay 60 maalmood si ay u soo jeediso xal rasmi ah. Haddii aysan sidaas sameyn, tallaabooyin dheeraad ah ayaa la qaadi doonaa.

“Waqtigaan la joogo, xal waara waxa uu noqon karaa in Google laga dalbado in ay iibiso qayb ka mid ah ganacsigeeda xayaysiinta dhijitaalka ah,” ayay tiri Teresa Ribera, ku-xigeenka madaxweynaha guddiga ee siyaasadda tartanka.
Si kastaba ha ahaatee, waxay sheegtay in marka hore la dhageysan doono soo-jeedinta Google ka hor inta aan la gaarin go’aanno kale oo waaweyn.

Google oo horey marar badan uga hortimid eedeymaha EU-da ayaa sheegtay in go’aanka cusub uu yahay “mid qaldan” isla markaana ay racfaan ka qaadan doonto.

“Ganaaxani waa mid aan cadaalad ahayn, wuxuuna si toos ah u saameyn doonaa kumanaan ganacsi oo Yurub ah oo ku tiirsan dakhliga xayeysiinta,” ayay tiri Lee-Anne Mulholland, madaxa arrimaha sharci ee Google.

Guddiga Midowga Yurub ayaa sidoo kale sheegay in dhaqanka Google uu horseeday koror ku yimid kharashka xayeysiinta, taasoo si dadban ugu faaftay qiimaha badeecooyinka ee macaamiisha Yurub, sidoo kalena uu yareeyay dakhliga warbaahinta, taas oo saameyn ku yeelan karta tayada iyo helitaanka macluumaadka.

Go’aankani wuxuu imaanayaa in ka badan laba sano kadib markii guddigu dacwadda rasmiga ah ka gudbiyay Google, wuxuuna qeyb ka yahay dadaalka sii kordhaya ee Midowga Yurub uu ku doonayo in uu xaddido awoodda shirkadaha waaweyn ee dhijitaalka sida Google, Apple, Amazon, Meta iyo Microsoft.

Waxaa intaas dheer, EU-du waxay dhawaan dhaqan galisay xeerka cusub ee Digital Markets Act, kaas oo si gaar ah loogu talagalay in lagula xisaabtamo shirkadaha waaweyn ee lagu tilmaamo “ilaalada albaabka internetka.”