Obama: Daacish waa burcad, ma meteli karto Islaamka
-
- Posted On 07-12-2015, 05:05AM
December 7, 2015 (GO)- Madaxweynaha Maraykanka Barack Obama ayaa sheegay in Kooxda Daacish ay tahay koox shufto ah oon meteli karin Islaamka.
Obama oo aqalka cad ka jeediyey khudbad si toos ah telefishinada looga baahiyey, wuxuu sidoo kale xusay in dagaalka ka dhanka ah argagixisadu ahayn dagaal u dhexeeya Maraykanka iyo Islaamka.
"Looma baahna inaan isku jeedsano oon dagaalka ka dhigno mid u dhexeeya Maraykanka iyo Islaamka...taasi waa sida uu doonayo Ururka Daacish, ururkaasi ma ahan mid Islaamka metala waa koox burcad ah oo dadka disha" ayuu yiri Obama.
Dadka Maraykanka wuxuu ugu baaqay in aysan muslimiinta ku faquuqin falalka ay kooxdaasi geysato.
Ugu dambeyntii wuxuu sheegay in Maraykanku dagaal dhulka ah la geli doonin Daacish, haseyeeshee uu adeegsan doono istaraatiijiyado kale.
"kama qayb qaadan doonno dagaal dhulka ah oo muddo dheer kasii socda Ciraaq ama Syria...duqeymaha cirka iyo tababarrada aan siino kooxaha dagaalka kula jira Daacish ayaa ah habab aan ku gaari karno guul"
Hadalka Madaxweynaha Maraykanka ayaa kusoo aadaya shan maalmood kadib, weerar 14 qof ku dhinteen oo ka dhacay magaalada San Bernardino ee gobolka California.
Weerarka oo lala beegsaday goob xafladi ka socotey, waxaa geystey Tashfeen Malik iyo Syed Rizwan oo ahaa lamaane muslim ah, kuwaasoo boolisku markii dambe toogasho ku dileen.
GAROWE ONLINE
