Spain oo Sharciyo siinaysa Nus Milyan Muhaajiriin Sharci-la’aan ah

MADRID, Spain — Dowladda Spain ayaa ku dhawaaqday inay siin doonto sharci deggenaansho ku dhowaad 500,000 oo muhaajiriin ah oo aan haysan dukumiinti sharci ah, tallaabo ka duwan jihada adag ee ka dhanka ah socdaalka ee ka jirta Mareykanka iyo dalal badan oo Yurub ah.

Go’aankan, oo Talaadadii lagu dhawaaqay, ayaa lagu sheegay inuu yahay mid lagu yareynayo tacaddiyada shaqo iyo ka faa’iidaysiga ka jira dhaqaalaha qarsoon ee Spain. Bangiga dhexe ee Spain iyo Qaramada Midoobay ayaa horay u sheegay in dalkaasi u baahan yahay ugu yaraan 300,000 oo shaqaale muhaajiriin ah sanad walba si loo ilaaliyo nidaamka daryeelka bulshada.

“Maanta waa maalin taariikhi ah oo dalkayaga u ah,” ayay tiri Wasiirka Socdaalka Spain, Elma Saiz, oo la hadlaysay warbaahinta. “Waxaan xoojinaynaa hannaan socdaal oo ku saleysan xuquuqda aadanaha, isdhexgalka bulshada, wada noolaanshaha, isla markaana la jaanqaadaya kobaca dhaqaalaha iyo isku duubnida bulshada.”

Saiz waxay sheegtay in tallaabadan ay tahay mid lagama maarmaan u ah ka jawaabidda xaqiiqada ka jirta waddooyinka dalka, isla markaana ay faa’iido u yeelan doonto dhaqaalaha Spain. Madaxtooyada ayaa sidoo kale sheegtay in go’aankan uu muhaajiriinta u oggolaan doono nolol “sharaf leh.”

Sida qorshahan cusub uu dhigayo, muhaajiriinta soo galay Spain ka hor 31-ka Diseembar 2025, isla markaana caddeyn kara inay dalka ku noolaayeen ugu yaraan shan bilood, ayaa heli doona deggenaansho sharci ah oo hal sano ah iyo oggolaansho shaqo oo ka shaqeyn kara dhammaan qaybaha dalka. Shuruudaha waxaa ka mid ah in aanay lahayn wax dembi ah oo hore.

Codsiyada ayaa la qaadan doonaa laga bilaabo horraanta bisha Abriil ilaa 30-ka Juun 2026.

Si kastaba ha ahaatee, tirada muhaajiriinta sharci-la’aanta ah ee ku nool Spain ayaa ka badan inta qorshahani daboolayo. Xarunta daraasaadka ee Funcas, oo la xiriirta ururka bangiyada CECA, ayaa qiyaastay in bilowgii 2025 ay Spain ku sugnaayeen ilaa 840,000 oo muhaajiriin ah oo aan sharci haysan. Badankood — ku dhowaad 760,000 — waxay ka yimaadeen Latin America, gaar ahaan Colombia, Peru iyo Honduras.

Funcas ayaa sidoo kale sheegtay in tirada muhaajiriinta sharci-la’aanta ah ay sideed jibbaar korodhay tan iyo 2017.

Ku dhawaaqistan Talaadada ah ayaa daba socota tallaabo kale oo dhaqan gashay bishii May ee sannadkii hore, taas oo lagu fududeeyay lana dedejiyay nidaamka sharciyeynta. Dowladda Spain ayaa sheegtay in siyaasaddaas ay suuragelin karto in ilaa 900,000 oo muhaajiriin sharci-la’aan ah ay helaan deggenaansho sharci ah saddexda sano ee soo socota.

GAROWE ONLINE