Yaxya Jammeh oo mar kale diiday inuu xilka wareejiyo
-
- Posted On 14-01-2017, 11:46AM
Madaxweynaha looga adkaaday doorashada dalka Gambia ka dhacday dabayaaqadiis sannadkii hore, ayaa ku gacan-sayray dalab uga yimid hogaamiyaasha dalalka Galbeedka Africa oo ku aadan inuu xilka ku wareejiyo ninka ka adkaaday ee Adama Barrow.
Yaxya Jammeh, oo shalay kulan la yeeshay madaxda Africa qaybtood, ayaa xusay inuusan wareejin doonin xilka islamarkaana uu dalka sii xukumayo maadama doorashadii dhacday ay ahayd mid la musuq-maasuqay.
Madaxda Africa, ayaa usoo jeediyay inuu kursiga ka dago 19 bishan.
Tallaabadaas ayaa keentay in hogaamiyaha mucaaradka ee ku guulaystay xilka Madaxweynaha Gambia Adama Barrow uu la safro wafdi heer gobol ah oo ka socda ECOWAS.
Waxay u amba baxeen dhinaca dalka Mali, halkaasoo la filayo in wadahadallo dheeraadka ah ka dhacaan.
Wakiilka Qaramada Midoobeey, Maxamed Ibnu Jambas, wuxuu u sheegay golaha amniga in ECOWAS qorshaynayso dalab ay u dirayso UN-ka si ciidamo loo geeyo Gambia.
ECOWAS, ayaa ku howllan dadaal kasta oo xilka looga qaadayo Madaxweyne Yahye, waxayna intaas ku dareen inay ka dhabayn doonaan sidii talada gacanta loogu galin lahaa dadka reer Gambia.
Shacabka dalkaas, ayaa qaybtood bilaabay inay u qaxaan wadamada deriska la ah sida Senegal iyagoo ka cabsanaya dagaallo dhexmara mucaaradka iyo dowladda xilka iminka haysa.
GAROWEONLINE
