​Doorashada golaha deegaanka Galkacyo oo socota

GALKACYO, Puntland- Madaxweynaha Cabdiwali Maxamed Cali Gaas ayaa ka qayb galay doorashada golaha deegaanka degmadaasi oo hadda kasocota xarunta gobolka Mudug ee Galkacyo.

Doorashada ayaa hadda maraysa wareegga koowaad, waxaana ku tartamaya afar murashax oo codadkii la dhiibtay u kala helay qaabkan hoose;

1.       Cismaan Salaad Fagaase 2 Cod

2.       Deeq Maxamud Xaashi 8 Cod

3.       Yaasiin Maxamuud Jaamac 3 Cod

4.       Maxamuud Yaasiin Axmed tumey 17 Cod

Jagada guddoomiye ku-xigeenka ayaa sidoo kale waxaa isu soo taagay labo Xildhibaan kuwaasoo lagu kala magacaabo; Farxaan Cabdi Gaafaa iyo Dr. Cabdifataax Xasan Xuseen Waloore, waxaana loo codayn doonaa doorashada guddoomiyaha kadib.

Golaha deegaanka degmada Galkacyo ayaa ka kooban 31 mudane, waxaana wareegto uu madaxweyne Gaas soo saaray lagu daray afar xubnood oo la sheegay in la siiyay haweenka.

Doorashadan ayaa kusoo beegmay xilli musuq-maasuq iyo waxqabad la'aan loo kala diray golahii ka horreeyay ee uu hogaaminayay Cabdicasiis Jamac Nugal kaasoo aan kamid ahayn ragga lasoo xulay.

GAROWEONLINE