Faah faahin Dooni siday hub sharci darro ah oo lagu qabtay xeebaha Puntland [Sawirro]
-
- Posted On 23-09-2017, 02:15PM
BOSASO, Puntland- Ciidamada ilaalada xeebaha Puntland ee PMPF loo yaqaano ayaa gacanta ku dhigay Doon siday hub sharci darro ah oo ka timid dhinaca waddanka Yemen, waxaana lagusoo bandhigay magaalada Bosaso.
Taliska ciidamada soo qabtay hubkan ayaa faah faahin ka bixiyay howlgalka lagusoo qabtay doontan, waxayna sheegeen in hubkan uu yahay mid si sharci darro ah lagu doonayay in lagusoo galiyo gudaha Puntland.
Gaashaanle Maxamed Maxamuud Xasan oo ka tirsan Saraakiisha Ciidamada ilaalada Xeebaha Puntland ee PMPF ayaa sheegay in ay ku guulaysteen soo qabashada hubkan ayna ku raad joogaan dadkii doonidaasi u rarnayd iyo halkii ay ku sii jeeday intaba.
“Doonidani waxaa gacanta ku soo dhigay ciidamada ilaalada Xeebaha ee Puntland,waxaana laga soo qabtay deegaanka Mareero halkaasi oo ay howlgalo ka wadeen ciidamadu,waxaa doonida saarnaa hub noocyo kaladuwan leh," Ayuu yiri Gaashaanle Maxamed Maxamuud oo kamid ah saraakiisha ciidamada badda Puntland.
Wuxuu intaas ku daray inaysan gacanta kusoo dhigi dadkii hubkan u socday iyo kuwii waday intaba, balse ay wadaan baaritaan.
Hubka la qabtay ayaa isugu jiray Qoryaha waaweyne ee dhishiikaha loo yaqaan, BKM, Ak47, Bastoolado iyo Sanaadiikh ay ku jirto rasaas.
Doontan ayaa lagu magacaabaa Al Furqaan, waxaana la sheegay inay leeyihiin ganacsato reer Puntland ah, balse hubkan uu socday gobollada dhexe ee dalka Somalia.
Faah faahin dheeraad ah lagama helayo howlgalkan oo kusoo aaday xilli inta badan waddanka Yemen oo ay dagaallo kasocdaan lagsoo gudbiyo hubka sharci darrada ah ee dalka lasoo galinayo.
GAROWEONLINE
