Gaas oo la kulmay mas'uuliyiin katirsan hay'ad QM u qaabilsan masiibooyinka
-
- Posted On 19-09-2016, 12:43PM
GAROWE, Puntland- Madaxweynaha Puntland Cabdiwali Cali Gaas, ayaa maanta xarunta madaxtooyada kula kulmay wafdi kasocday hay'ad Qaramada Midoobay u qaabilsan Masiibooyinka oo lagu magacaabo STAIT.
Labada dhinac ayaa ka wada hadlay sidii la isaga kaashan lahaa ka qayb qaadasha masiibooyinka dabiiciga ah ee ka dhaca dhulka Puntland.
Wafdigan la kulmay madaxweyne Gaas ayaa waxaa hogaaminayay Panos Moumtzis ayaa iyadoo ka mid ahaayeen Stuart Kefford, Ulrika Blom iyo Cyril Ferrand, oo kamid ah saraakiisha sar sare ee hay'addaasi.
Xubnahan ayaa madaxweyne Gaas, kala hadlay qaabka la isaga kaashan lahaa abaaraha ka jira deegaanada Puntland iyo saamaynta duufaantii El-nino, waxayna ballan qaadeen inay diyaar u yihiin sidii kaalin laxaad leh howshaasi looga gaysan lahaa.
Madaxweynaha Puntland, ayaa xubnahan ku ammaanay sida wanaagsan ee ay u doonayaan inay ka taageeraan dhinaca khataraha masiibooyinka, isagoo sheegay inay si la shaqayn doonaan.
Shirka labada dhinac ayaa kusoo beegmay xilli haatan la sugayo xilli robaadka Dayrta, waxaana qaar kamid ah deegaanada Puntland laga dareemayaa abaar iyo biyo la'aan xoog leh.
GAROWEONLINE
