Haween ka cabanaya sicir barar degmada Qardho [Dhagayso]
-
- Posted On 28-07-2016, 03:25PM
QARDHO, Puntland- Haweenka ku dhaqan degmada Qardho gaar ahaan kuwa ka ganacsada Khudradda ayaa ka cabanaya sicir barar baahsan kaasoo keenay inay saaka xiraan suuqyadoodii kadib markii ay lasoo gudboonaatay xaalada adag.
Qaar kamid dumarka Khudradda Cagaaran ku iibiya xarunta gobolka Karkaar ayaa warbaahinta u sheegay inay xaaladdu ku adkaatay kadib markii sarrifka lacagta Doollarka cirka isku shareeray islamarkaana gaaray halkii dollar 25,000Shso.
Maamulka Puntland ayay fariin adag u direen iyagoo ka codsaday inay wax ka qabtaan xaaladda iyo sicir-bararka soo laab-laabtay tan iyo intii madaxweynaha Cabdiwali Maxamed Cali talada Puntland qabtay.
Dumar ayaa sheegay in wax lagu kala iibsado lacag qalaad sidaasi owgeed xamili kari waayeen inay sii shaqeeystaan maadama ay u badanyihiin danyar.
Cabashada haweenka degmada Qardho ayaa imaanaya xilli dhawr jeer caasumada Garowe, Bosaso iyo magaalooyin kale ka dhaceen banaanbax looga soo horjeedo sicir barar baahsan kuwaasoo ka dhashay lacago lagu daabacay xarunta gobolka Bari taaso mas'uul ka ahayd xukuumadda Puntland.
Majirto ilaa hadda tallaabo rasmi ah oo ay qaatay xukuumaddu, waxaana maalinba maalinta ka dambaysa sare usii kacaya sarrifka doollarka oo hadda maraya inta u dhaxaysa 26-25,000Shso.
GAROWEONLINE
