Puntland: Howlgalka Calmiskaad oo guulo laga gaaray

Boosaaso – Taliska Ciidanka la dagaalanka argagixisada ee Puntland ayaa shaaciyay in howlgalka ka socda buuraleyda Cal-Miskaad uu sii wado guulo muuqda, kadib laga sifeeyay Daacish inta badan dhulkii ay joogtay, islamarkaana la dilay boqolaal xubnood oo ajaaniib ay ku jiraan.

Sida lagu sheegay warbixin soo baxday, ciidamada difaaca Puntland ayaa helay god tababar oo ay isticmaalaan dagaalyahanada ISIS, kaas oo ku yaalla inta u dhexeysa Lugta Garared iyo Sul Sul ee gudaha buuraha Calmiskad, gobolka Bari, xilli howlgalka uu marayo wejigii ugu dambeeyey.

Waxyaabaha laga helay goobta waxaa ka mid ah mashruuc waxbarasho Carabi ah, projector iyo kaarka aqoonsiga muwaadin Tanzanian ah oo la rumeysan yahay inuu ka tirsanaa kooxda. Sida la xaqiijiyey, kooxda ISIS-Somalia ayaa dagaalyahano ka soo qortay waddamo kala duwan oo Bariga Afrika ah, sida Ethiopia, Tanzania iyo Morocco.

“Ciidamadeennu waxay heleen god tababar oo ay ISIS u isticmaasho tababarka dagaalyahanadooda, wuxuuna u dhexeeyey Lugta Garared iyo Sul Sul. Waxaa laga helay agab waxbarasho oo Carabi ah, projector, iyo kaar aqoonsi oo uu lahaa argagixiso Tanzanian ah. Howlgallada nadiifinta kama dambeynta ah ayaa weli socda si loo tirtiro dagaalyahanada haray iyo madaxda baxsadka ah,” ayaa lagu yiri war-saxaafadeedka.

Buuraleyda Calmiskad ayaa loo arkaa saldhig weyn oo ay kooxahaasi ku tababartaan, hase yeeshee ilaa hadda waxaa burburay godad badan, taasoo keentay in dagaalyahanada ay dib uga gurtaan dhulkaas iyadoo ciidamadu ay guulo ka gaareen jiiddooyin badan.

Dhinaca kale, ciidamada Puntland ayaa gacanta ku dhigay gaari siday raashin, iyadoo la qabtay laba nin oo waday gaarigaas. Gaariga ayaa lagu qabtay meel ku dhow Boosaaso, isagoo ku sii jeeday buuraha Calmiskad, sida lagu sheegay war-saxaafadeed kale oo ka soo baxay xarunta.

“Waxaan baaritaan ku haynaa gaari siday sahay raashin ah iyo laba nin oo watay, kuwaas oo lagu qabtay iyagoo raashin ka dhoofinaya Boosaaso una waday buuraha Calmiskad,” ayaa lagu yiri bayaan kale. “Inta ay socoto howlgallada ka dhanka ah ISIS ee Calmiskad, lama oggolaan doono sahay ay helaan kooxahaasi iyadoo aysan oggolaan dowladda.”

Puntland waxay si dhow ula shaqaynaysaa ciidamada Maraykanka ee AFRICOM iyo kuwa Isu-tagga Imaaraadka Carabta (UAE) oo ku taageeray duqeymaha hawada ah iyo taageero sirdoon. Si kastaba ha ahaatee, dowladda federaalka Soomaaliya, ayaa lagu eedeeyey in aysan garab istaagin ciidamada Puntland dagaalka kula jira Daacish.

GAROWE ONLINE