Puntland "Maanta laga bilaabo waa xirantahay xuduudeenu" [Dhagayso]
-
- Posted On 01-09-2016, 03:53PM
GALKACYO, Puntland- Dowladda Puntland ayaa maanta hirgalisay wareegto dhawan kasoo baxday xafiiska madaxweyne ku-xigeenka Puntland Cabdixakiim Cabdullaahi Camay, kaasoo laamaha ammaanka lagu farayay inay baaritaan ku sameeyaan gawaarida kasoo galaysa Koonfurta Somalia intaysan usoo gudbin gudaha maamulkaasi.
Shir jaraa'id oo magaalada Galkacyo warbaahinta ugu qabtay Afhayeenka xukuumadda Cabdullaahi Maxamed Jaamac Quraan Jecel, ayaa ku sheegay in maanta oo taariikhdu tahay 01 September, 2016 ay xirantahay xuduuda Puntland isagoo sheegay in laamaha ammaanku uga howlgalayaan sidii loogu talo galay.
Quraan Jecel ayaa u digay gawaarida iyo ganacsatada iska leh kuwaasoo ugu baaqay inay u hogaansamaan ammarka dowladda, isagoo ciddi hareer marta ku sifeeyay kooxo u adeega Al Shabaab.
Wuxuu xusay in qorshahan uusan ahayn mid lagu kala dhantaalayo isu socodka bulsha, balse wuxuu sheegay in lagu adkaynayo ammaanka.
Hadalkan ayaa yimi xilli maanta Kantaroolada magaalada Galkacyo lagu heliyay gawaari xammuul siday kuwaasoo u socday Puntland iyo Koonfurta Somalia.
Arrintan waxaa horay walaac uga muujiyay ganacsatada iyo maamulka Galmudug, balse waxaa goor sii horaysay tallaabadaasi ganafka ku dhuntay Camay oo shir jaraa'id warbaahinta ugu qabtay magaalada Galkacyo, isagoo sheegay inaysan gor-gortan amniga Puntland cidna kala gali doonin.
GAROWEONLINE
