Qaylo dhaan kasoo yeeraysa degmada Jarriiban [Dhagayso]
-
- Posted On 18-06-2016, 03:58PM
GAROWE- Guddoomiyaha degmada Jirriiban ee gobolka Mudug, Maxammed Yusfu shirwac, ayaa ka dayriyay xaaladda qaybo kamid ah deegaanada hoos yimaada degmadaasi, waxaana uu sheegay inay abaar xun halkaasi ka jirto iyadoo ay ugu darantahay dhanka biyaha.
Shirwac oo waraysi siinayay Radio Garoowe, ayaa sheegay in degmadu ka kooban tahay 53 deegaan, islamarkaana 33 kamid ah roobkii gu'gu seegay.
Degaannada;Sallax, Shillin-xaraare, Mayle, Dul-weyne, Madmadoobe, Sacbaan iyo Godcad ayuu guddoomiyuhu xaaladdooda ka dayriyey,wuxuna dowladda Puntland iyo hay'adahaba ka codsadey in ay gacan u fidiyaan.
Ceelashii biyaha laga cabi jiray ayuu xusay inay noqdeen kuwa cilladoobay isagoo intaasi raaciyay inay hadda meelaha biyuhu ku jiraan gabaabsi yihiin.
Cabashadan, ayaa kusoo beegantahay xilli shirkii khamiislaha ahaa ee golaha wasiirrada Puntland todobaadkii hore, guddiga abaaruhu kusoo bandhigeen warbixin ay uga hadlayaan xaaladda gobollada Puntland iyagoo sheegay inay jiraan goobo u baahan in deg deg wax looga qabto.
GAROWEONLINE
