Jubbaland: Al Shabaab oo weerar ku dishay 22 Askari
-
- Posted On 03-09-2017, 10:45AM
KISMAYO, Somalia- Mallayshiyaad katirsan kooxda Al Shabaab ayaa saaka waabarigii hore weerar loo adeegsaday baabuur laga soo buuxiyay walxaha qarxa, ku weeraray saldhiga ciidamada Jubbaland iyo kuwa dowladda Somalia ku leeyihiin deegaanka Buulo Gaduud oo 30KM u jirta magaalada Kismayo.
Qaar kamid ah dadka deegaanka ayaa ku waramaya in abaare Salaadii Subax la maqlay jugta Qarax xoog leh kadibna ay xigtay rasaas tiro badan oo ka dhacaysay hubka noocyadiisa kala duwan.
Mas’uuliyiin katirsan maamulka Jubbaland ayaa Warsidaha Garowe Online u xaqiijiyay in weerarkaas ay ku dhinteen 22 Askari, dhaawacuna intaas ka badanyahay.
Sarkaalkaas ayaa intaas ku daray inay jiraan baabuur dagaal iyo kuwa xamuul oo lagu qabsaday mudadii uu dagaalku socday.
Dhinaca kale kooxda Al Shabaab ayaa baraha internet-ka ee taageera ku baahisay inay la wareegeen Saldhigaas iyo guud ahaan deegaanka Buulo Gaduud.
Saraakiisha Ammaanka Jubbaland oo xaqiijiyay in gacantooda ka baxday deegaankaas ayaa xusay in goobtaas ay gaareen ciidamo gurmad ah oo katagay magaalada Kismayo, kuwaasoo markii dambe ku guulaystay in kooxda Al Shabaab dib looga saaro saldhiga.
Xaaladda Buulo Gaduud ayaa wali kacsan, waxaana ka socda dhaq-dhaqaaqyo ciidan.
Dhawaan ayay ahayd markii ciidamada Jubbaland ay ka saareen deegaankaas mallayshiyaad katirsan ururka Al Shabaab.
Kooxdan katirsan Al Qacida ayaa xoojisa weeraradeeda xilliyada ciida iyo Soonka, taasoo kor u qaada dhibaatada ay ku hayaan waddanka guud ahaantiis.
GAROWEONLINE
