Baarlamaanka Somalia oo dib u celiyay Hindise Sharciyeed cusub
-
- Posted On 24-07-2017, 11:06PM
MUQDISHU, Somalia - Xildhibaanada Baarlamaanka Somalia ayaa ku celiyay Wasiirka Caddaalada Hindise Sharciyeedka Dhismaha Guddiga Madaxa-banaan ee la dagaalanka Musuq Maasuqa.
Wasiirka Wasaarada Cadaalada dalka Xasan Xuseen Xaaji ayaa Maanta hortagey Gollaha Shacabka, oo uu kahor aqriyay Hindise Sharciyeedkaas oo ay Gollaha Wasiirada ansixiyeen 22-kii bishii hore ee Juun.
Wasiirka ayaa Xildhibaanada u sharaxay Muhiimada ay dalka u leedahay dhismaha Guddigan, isagoo daboolka ka qaadey sharciyada uu ku shaqeynayo iyo Shaqooyinka ay qabanayaan Xubnahiisa.
Ku xigeenka labaad ee Guddoomiyaha Baarlamaanka Mahad Cabdalla Cawad ayaa khudbad jeediyay ayaa sheegay in Warqadaha loo qeybiyay Xildhibaanada aysan ku cadeyn Miisaaniyada uu ku shaqeynayo Guddiga.
"Waxaa muhiim in la cadeeyo Miisaaniyada uu ku shaqeynayo Guddigaan, maadaama Warqada loo gudbiyay Xildhibaanada aysan ku cadeyn," Ayuu yiri Cawad oo ka hadlay Kulanka Gollaha Shacabka.
Xildhibaanada ayaa qaatay go'aanka uu soo jeediyay Cawad, oo ay isku raaceen in Wasiirka lagu celiyo heerkan isla markaana uu soo Cadeeyo Miisaaniyada Guddigaan ka dibna uu Xildhibaanada kula soo laabto, si ay uga doodaan Kulankooda dambe.
GAROWOONLINE
