CC Cabdishakuur: Xasan Sheekh wuxuu iska indhatiray dagaalka Puntland kula jirto Daacish 

MUQDISHO, Soomaaliya - Xildhibaan Cabdiraxmaan Cabdishakuur Warsame ayaa ku eedeeyay Madaxweynaha Soomaaliya, Xasan Sheekh Maxamuud, inuu iska indhatiray howlgalada ka dhanka ah kooxda Daacish ee ka socda Puntland, sababo la xiriira khilaaf siyaasadeed oo kala dhaxeeya hoggaamiyaha Puntland, Siciid Deni.

Cabdiraxmaan Cabdishakuur ayaa ku dhaliilay dowladda federaalka inay taageeri waysay dadaallada Puntland ee la dagaallanka Daacish, isagoo su’aal ka keenay mudnaanta siyaasadeed ee Madaxweyne Xasan Sheekh, haddii xoreynta dalka aysan garab istaagayn.

Wuxuu Xildhibaanka si gaar ah u tilmaamay safarka uu madaxweynuhu dhawaan ku tegay Itoobiya safar labo maalin ah, si uu u qanciyo Ra’iisul Wasaaraha Itoobiya, Abiy Axmed, halka uu ka dayacay arrimaha amniga gudaha ee Soomaaliya.

CC Shakuur ayaa ku booriyay dowladda federaalka inay mudnaanta siiso la dagaallanka kooxaha argagixisada ee halista ku ah Soomaaliya, taasoo muhiim u ah xasilloonida iyo badbaadada shacabka Soomaaliyeed. Wuxuu intaa ku daray in khilaafka siyaasadeed aanu ka hor istaagin iskaashiga lagama maarmaanka ah ee amniga qaranka.

Eedeymahan ayaa imanaya iyadoo Puntland ay wado howlgal culus oo ka dhan ah kooxda Daacish, taasoo si weyn u wiiqday awooddooda Kooxda ee gobolka Bari, balse loo baahan yahay taageero ballaaran oo heer qaran ah si loo xaqiijiyo guusha.

GAROWE ONLINE