Ciidanka dowladda Soomaaliya oo Hawlgal Ka Fuliyay Jubaland

MUQDISHO, Soomaaliya — Wasaaradda Gaashaandhigga Soomaaliya ayaa ku dhawaaqday in hawlgal ballaadhan oo ka dhacay deegaannada dowlad-goboleedka Jubbaland lagu dilay 27 xubnood oo ka tirsanaa kooxda Al-Shabaab.

War-saxaafadeed kasoo baxay wasaaradda maalintii Salaasada ayaa lagu sheegay in hawlgalkan ay iska kaashadeen ciidanka qaranka, kuwa amniga ee Jubbaland iyo saaxiibbada caalamiga ah oo fuliyay duqaymo dhanka cirka ah. In kasta oo aan si rasmi ah loogu magacaabin saaxiibbada caalamka, haddana Maraykanka ayaa hore u caawin jiray Soomaaliya dagaalka ka dhanka ah kooxdan.

Hawlgalkan oo ka dhacay gobollada Jubbada Hoose iyo Jubbada Dhexe ayaa si gaar ah u beegsaday degmooyinka Jilib, Xagar iyo Afmadow. Dawladda Soomaaliya ayaa sheegtay in kooxda Al-Shabaab lagu gaadhsiiyay "dharbaaxo weyn", iyadoo laga dilay xubno muhiim ah. Sidoo kale, ciidanka qaranka ayaa gacanta ku dhigay hub iyo qalab ciidan oo kala duwan, kuwaas oo isugu jira qoryaha darandooriga u dhaca ee BKM, Sabanno (RPG), qoryaha AK-47, iyo miinooyin dhulka lagu aaso oo wasaaraddu sheegtay inay kooxdu doonaysay inay u adeegsato shacabka.

Wasaaradda Gaashaandhigga ayaa hoosta ka xariiqday in hawlgalladu ay weli socdaan si loo baadi-goobo firxadka Al-Shabaab, loona xaqiijiyo amniga iyo xasilloonida dadka rayidka ah. Tan iyo sannadkii 2007, dawladda federaalka Soomaaliya waxay dagaal kula jirtay kooxdan xidhiidhka la leh Al-Qaacida. Madaxweyne Xasan Sheekh Maxamuud ayaa hore u sheegay in kooxdani ay "burburinayso Soomaaliya iyo dadkeeda," isagoo dalbaday inay joojiyaan argagaxisada dalka wiiqaysa.

Dagaallada dalka ka socda ayaa saameyn weyn ku yeeshay shacabka; intii u dhaxaysay Jannaayo iyo Luulyo 2025, ku dhowaad 60,000 oo qof ayaa ku barakacay dagaalladii ka dhacay gobolka Shabeellada Dhexe. Al-Shabaab ayaa loo arkaa ururka ugu khatarta badan ee Al-Qaacida xidhiidhka la leh, iyagoo weerarro ka fuliyay dalalka dariska ah sida Kiiniya, Uganda, iyo Jabuuti.

GAROWE ONLINE