Dhex-dhexaadin siyaasadeed oo xal loogu raadinayo Khilaafka Galmudug iyo Villa Somalia

MUQDISHO, Soomaaliya – Ergagii ka koobnaa siyaasiyiin sare iyo xildhibaano hore oo ka tirsanaa Baarlamaankii 11-aad ee Soomaaliya ayaa dib ugu soo laabtay magaalada Muqdisho, kaddib maalmo ay wada-hadallo kula lahaayeen magaalada Dhuusamareeb Madaxweynaha Galmudug Axmed Cabdi Kaariye “Qoorqoor,” sida ay sheegeen ilo xog ogaal ah.

Ergada ayaa inta badan ka koobnayd siyaasiyiin ka soo jeeda Galmudug, kuwaas oo lagu tilmaamay inay wadeen dadaallo dhexdhexaadin ah oo lagu kala gudbinayay fariimo u dhexeeya madaxda heer federaal iyo kuwa dowlad-goboleedka, sida ay ilo wareedku sheegeen.

Qodobada ugu muhiimsan ee laga wada hadlay ayaa waxaa ka mid ahaa soo jeedin la xiriirta in Qoorqoor loo ogolaado inuu ka qeyb galo doorashooyinka soo socda, isagoo u tartamaya xisbi siyaasadeed oo gaar ah, iyo sidoo kale doodo ku saabsan qaab-dhismeedka iyo madaxbannaanida guddiga doorashooyinka.

Sidoo kale, wada-hadallada ayaa lagu tilmaamay kuwo qeyb ka ah dadaallo ballaaran oo lagu doonayo in albaab wada hadal looga furo xiriirka u dhexeeya Madaxweynaha Soomaaliya Xasan Sheekh Maxamuud iyo Qoorqoor.

Si kastaba ha ahaatee, xogaha ayaa sheegaya in kulamadii Dhuusamareeb ay ku soo dhammaadeen natiijo la’aan, iyadoo ay weli taagan yihiin khilaafaad ku saabsan dammaanad siyaasadeed, dhexdhexaadnimada hannaanka doorashada iyo dalabyo la xiriira awood-qaybsiga dowlad-goboleedka.

Dhanka kale, ilo ku dhow Villa Somalia ayaa sheegay in Axaddii ay wada-hadallo hoose dhexmareen mas’uuliyiin ka tirsan dowladda Federaalka iyo Liibaan Axmed, oo loo arko shaqsi ka mid ah tartamayaasha siyaasadeed ee la xiriira arrimaha Galmudug, inkastoo faahfaahin dheeraad ah aan la shaacin.

Ganacsato iyo daneeyayaal siyaasadeed ayaa sidoo kale ku biiray dadaallada socda, iyagoo ku baaqay in si degdeg ah loo gaaro heshiis siyaasadeed oo lagu xalliyo xiisadaha ka taagan mustaqbalka Galmudug, gaar ahaan arrimaha la xiriira Madaxweyne Qoorqoor. Waxay ku adkaysanayaan in heshiis kama dambeys ah la gaaro ka hor toddobaadka ugu horreeya bisha Juun.

Ma jiro wax war ah oo rasmi ah oo ka soo baxay dowladda Federaalka ama maamulka Galmudug oo ku saabsan wada-hadallada la sheegay.

GAROWE ONLINE