Dib-u-dhac ku yimid shirkii hogaamiyeyaasha Soomaalida

MUQDISHO, Soomaaliya - Kulankii lagu wadday in uu maanta uu Muqdisho gaar ahaan xerada Afasiyooni ku dhexmaro madaxda Soomaalida ayaa dib-u-dhac uu ku yimid, sidda ay baahisay warbaahinta dowladda.

Wakaaladda wararka Qaranka ee SONNA ayaa tabisay in dib-u-dhaca uu salka ku hayo socdaalka madaxweynaha Galmudug ugu ambabaxay magaaladda Dhuusamareeb ee xarunta KMG ah ee maamulkiisa.

Axmed Cabdi Kaariye [Qoor-qoor] ayaa shalay u duulay Dhuusamareeb si uu u soo cusbooneysiisto mudada dastuurka maamulkaas u ogolaanayo in uu degaanada maamulkaas ka maqnaado oo ah afartan iyo shan casho.

"Madaxda ayaa lafilayaa in shirka ay isugu soo laaban doono maalinta barri ah 7- da Bisha," ayaa lagu yiri warbixin ay SONNA ku daabacdey ciwaankeeda shaqsiga ah ee baraha bulshadda sidda Facebook-ga.

Dhanka kale, Qoorqoor ayaa lagu qeexay caqabada ugu weyn ee shirka u socda dowladda federaalka iyo maamuladda kaasoo xal loogu goobayo is-mari-waaga ka taagan qabsoomida doorashooyinka madaxtiniamda.

Illo wareedyo ku dhow kulanka Afasiyoone oo u waramay warsidaha Garowe Online waxay xuseen in Qoorqoor mar ku hanajabey Inuu ka baxayo shirka isagoo taageero u muujinaya Madaxweynaha xilkiisu dhamaadey.

Shirka Afasiyooni oo laba maalmood horey u qabsoomay ayaanan miradhalin wali. Ka qeybgaleyaashu waxay is-faham buuxa ka gaari waayeen qodobadda xudunta u ah khilaafka ee u baahan in ajandaha lagu daro.

GAROWE ONLINE