Dowladda Soomaaliya oo Eedeyn Culus U Jeedisay Mucaaradka kadib Dagaal Ka Dhacay Muqdisho

MUQDISHO, Soomaaliya - Dowladda Federaalka Soomaaliya ayaa ku eedeysay siyaasiyiin mucaarad ah in ay isku dayeen in ay xoog ku qabsadaan saldhigga booliska degmada Warta Nabadda ee magaalada Muqdisho, kadib markii ay halkaas ku dagaalameen ilaaladooda gaarka ah iyo ciidanka ammaanka qaranka.

Bayaan rasmi ah oo kasoo baxay Wasaaradda Warfaafinta ayaa lagu sheegay in koox siyaasiyiin ah oo ay wehliyeen ilaalo hubeysan ay isku dayeen in ay xoog ku galaan xarunta saldhigga booliska, balse ciidamada dowladda ay ka hortageen weerarkaasi. Inkasta oo aan la shaacin tirada rasmiga ah ee khasaaraha, ayaa la xaqiijiyay in ay jiraan dhaawacyo iyo khasaare kale oo ka dhashay is-rasaaseynta.

“Dowladdu waxay si adag u cambaareyneysaa falalka lagu wiiqayo amniga caasimadda, ee ay ku kacayaan siyaasiyiin doonaya inay si xoog ah ku qabsadaan Saldhigga Booliska Degmada Warta Nabadda,” ayaa lagu yiri bayaan kasoo baxay Wasaaradda Warfaafinta.

Dowladda ayaa mas’uuliyadda dhacdada dusha uga tuurtay siyaasiyiinta mucaaradka, iyagoo ku eedeeyay inay jebiyeen sharciga isla markaana halis geliyeen nolosha shacabka. “Mas’uuliyadda wixii dhacay waxay saaran tahay kuwa si bareer ah u xadgudbay awoodda iyo nidaamka dowladeed,” ayaa lagu daray.

Dowladdu waxay uga digtay kooxaha siyaasadda ku lug leh in ay ka fogaadaan tallaabo kasta oo amni-darro ka abuuri karta magaalada, iyadoo ballan qaaday in ay difaaceyso amniga shacabka, hay’adaha dowladda, iyo dastuurka dalka.

Xiisaddan ayaa timid maalin un kadib markii Madasha Badbaado Qaran ee Mucaaradka — oo ay ku jiraan siyaasiyiin caan ah sida Madaxweynihii hore ee Soomaaliya Shariif Sheekh Axmed — ay ku dhawaaqeen inay dacwado ka gudbinayaan Madaxweyne Xasan Sheekh Maxamuud iyo mas’uuliyiin sare, iyadoo lagu eedeeyay musuqmaasuq, xadgudubyo xuquuqul insaaneed, iyo jabinta dastuurka.

Madashu waxay sidoo kale dowladda ku eedeysay in si sharci-darro ah loo beddelay dastuurka federaalka ee 2012, la hakiyay doorashooyinkii dowlad-goboleedyada, isla markaana la iibiyay dhul dadweyne, taasoo keentay barakac iyo xoog ku bixid ay la kulmeen qoysas sabool ah.

Mucaaradku waxay sheegeen in dalka uu galay "muran siyaasadeed iyo mid dastuur ah oo khatar ku ah dowlad-dhisidda iyo amniga qaran." Waxay sidoo kale dowladda ku eedeeyeen in ay dayacday dagaalka ka dhanka ah Al-Shabaab, iyadoo xoogga saareysa kelitalisnimo siyaasadeed.

Madashu waxay ugu baaqday shacabka Soomaaliyeed ee gudaha iyo dibedda jooga in ay si nabad ah u mudaaharaadaan si ay uga hortagaan waxa ay ugu yeereen musuqmaasuq baahsan iyo ku tumashada awoodda dowladeed.

GAROWE ONLINE