Dowladda Soomaaliya oo Ka Laabatay xayiraadda Baasaboorka Taiwan Iyadoo uu Cadaadis Saaray Mareykanka

MUQDISHO, Soomaaliya - Dowladda Federaalka Soomaaliya (DFS) ayaa la sheegay in ay ka laabatay go’aankii ay horey ugu mamnuucday dadka wata baasaboorka Taiwan inay soo galaan dalka, tallaabadan oo loo aaneynayo cadaadis kaga yimid Mareykanka iyo daneeyayaal kale oo arrintan diidanaa.

Bishii Abriil ayay DFS ku dhawaaqday xayiraadda, iyadoo ku eedeysay Taiwan (Jamhuuriyadda Shiinaha) inay faragelin ku sameyneyso arrimaha gudaha Soomaaliya, gaar ahaan xiriirka ay la leedahay Somaliland oo sheegata madaxbannaani.

Taiwan iyo Somaliland labaduba waxay sheegtaan inay yihiin dalal madax bannaan — mid ka go’ay Shiinaha iyo mid ka go’ay Soomaaliya — hase yeeshee beesha caalamka weli si rasmi ah uguma aqoonsan dalal madax bannaan.

Mareykanka oo ah xulafo muhiim u ah Soomaaliya ayaa si adag uga horyimid xayiraaddaas, isagoo u arkay in ay u muuqato in Soomaaliya ay u janjeertay dhanka Beijing. Dowladda Shiinaha ayaa Taiwan u aragta gobol gooni isu taagay, waxayna kasoo horjeedda aqoonsi kasta oo caalami ah oo la siiyo.

Sarkaal sare oo ka tirsan Wasaaradda Arrimaha Dibadda ee Mareykanka ayaa hortiisa ka sheegay Aqalka Senate-ka in Mareykanka soo dhaweynayo go’aanka Soomaaliya, isagoo ku tilmaamay mid muujinaya isbedel siyaasadeed oo wanaagsan.

"Waxaan aad ugu faraxsanahay in dowladda Soomaaliya ay ka laabatay xayiraaddii baasaboorka Taiwan, una oggolaatay in dib loo aqoonsado dukumiintiyada safarka ee Taiwan," ayuu yiri sarkaalkaas.

"Taiwan waa xubin masuul ah oo ka tirsan bulshada caalamka. Sida dal u wajahdo Taiwan waxay calaamad u tahay haddii uu rabo xiriir muhiim ah oo uu la yeesho Mareykanka," ayuu raaciyay.

Shiinaha iyo Mareykanka ayaa ku tartamaya saameynta ganacsi, ciidan iyo mid istiraatijiyadeed ee qaaradda Afrika, iyadoo labada dal ay adeegsanayaan cadaadis iyo tallaabooyin isdaba-joog ah si ay u gaaraan danohooda. Soomaaliya ayaa kamid ah dalalka istiraatiijiga ah ee ay labaduba indhaha ku hayaan.

GAROWE ONLINE