Fahfaahin: Taliye katirsan NISA oo lagu dilay Muqdisho
-
- Posted On 17-09-2017, 04:19PM
MUQDISHO, Somalia - Waxaa Maanta Muqdisho lagu dilay Taliye sare oo katirsanaa Hay'adda Nabad Sugida iyo Sirdoonka Somaaliya ee (NISA), oo lagu magacaabi jirey Maxamuud Xasan Maclin (Qooley).
AUN Qooley oo ahaa Taliyaha NISA ee degmada Kaxda, ayaa u u dhintay dhaawac culus oo kasoo rasaas Kooxo hubaysan ay ku fureen Gaari uu watay, xilli uu marayay aagga Xoosh ee degmada Dharkeenlay.
Askari ilaalo u ahaa Marxuumka ayaa goobta ku dhintay, iyadoo Kooxda dilka fulisay oo watay Gaari nooca NOAH ah ay u suurta gashay inay baxsadaan, kahor inta aysan Ciidamada amniga soo gaarin.
Saraakiisha NISA ayaa sheegay inay wadaan baaritaano ku aadan dilka Sarkaalka, oo noqonaya kii ugu dambeeyay dilal qorsheysan, oo maalmihii lasoo dhaafay ka dhacayay degmooyinka Wadajir iyo Dharkeenlay.
Ciidamada dowladda Federaalka Somaaliya ayaa dhawaan soo qabtey Gaari NOAH iyo nin watay, oo ay uga shakiyeen inuu ahaa midkii loo adeegsaday dhowr dilka oo magaalada Muqdisho ka dhacay.
Amniga Muqdisho ayaa ka yara wanaagsan xilliyadii hore, tan iyo markii dowladda Madaxweyne Farmaajoo billowday Howlgalka Xasilinta Caasimadda, oo loo arko inuu wax badan soo kordhiyay.
GAROWEONLINE
