Fiqi: Taladii Soomaaliya dad kooban ayay gacanta u gashay [Dhageyso]
-
Wariyaha Muqdisho Garowe Online
- Posted On 13-12-2017, 10:40AM
MUQDISHO, Soomaaliya - Axmed Maclin Fiqi, oo kamid ah Xildhibaanada Gollaha Shacabka ayaa sheegay in 27 sano kadib taladii wadanka ay kusoo aruurtay dad kooban oo waxqabadkooduna xun yahay.
Fiqi ayaa aad u dhaliilay hanaanka maamulka Madaxweynaha Soomaaliya Maxamed Cabdullaahi Farmaajo, oo uu sheegay in dhamaan balan-qaadyadii uu sameeyay uusan midna fulin.
"Soomaaliya taladeedu meel xun ayay ku socotaa, waa ayaan darro in 27 sano kadib ay dad kooban ku aruursanaato, wax allaale wuxuu balan qaadey Farmaajo waxba kama fulin," ayuu yiri Xildhibaan Fiqi.
Wuxuu tilmaamay Xildhibaan in ay jiraan xubno ka tirsan Dowladda oo si gaar ah ula wareegay taladii dalka, oo ku shaqeeya danaha dalal kale oo baasabooradooda ay wataan, kuwaasi oo awooda si qaldan u adeegsanaya.
Xildhibaan Fiqi oo horey usoo noqday Agaasiimaha Hay'adda Sirdoonka iyo Nabad Sugida [NISA], ayaa iska fogeeyay inuu kamid yahay dadka dalalka shisheeye lacagta siiyaan si ay u dumiyaan xukuumadda.
Hadalka Fiqi ayaa kusoo beegmaya xilli maalmihii lasoo dhaafay ay soo baxayeen warar sheegaya in Xildhibaano katirsan Aqalka hoose iyo Siyaasiyiin caan ah ay wadaan mooshin ka dhan ah Farmaajo.
Warsidaha Garowe Online ayaa ogaaday in Mooshinkan ku wajahan Madaxweynaha la filayaa in loo gudbiyo Gudoonka Gollaha Shacabka kahor inta uusan fasaxa galin 16-ka bishan December. Halkan ka akhri.
GAROWE ONLINE
