Garsoore Soomaaliyeed Cumar Cartan oo loo xushay Koobka Adduunka 2026

MUQDISHO – Garsooraha caalamiga ah ee Soomaaliyeed, Cumar C/qaadir Cartan, ayaa loo xushay inuu garsoore ka noqdo 2026 FIFA World Cup, isagoo noqday garsoorihii ugu horreeyay ee Soomaali ah ee ka qeyb gala tartanka kubadda cagta ee ugu weyn caalamka. 

Ku darista Cartan ee liiska rasmiga ah ee garsoorayaasha ay soo saartay FIFA ee tartanka ay si wadajir ah u martigelinayaan Mareykanka, Canada iyo Mexico ayaa loo arkaa guul taariikhi ah oo u soo hoyatay kubadda cagta Soomaaliya, isla markaana sare u qaadaysa muuqaalka dalka ee masraxa ciyaaraha caalamiga ah.

"Guushan qiimaha leh waa mid kor u qaadaysa sumcadda Soomaaliya, isla markaana muujinaysa kartida iyo hibada ay leeyihiin dhalinyarada Soomaaliyeed ee ku hanweyn in ay dalkooda ku matalaan fagaarayaasha caalamka. Waxaan ku bogaadinayaa dadaalka, xirfadda iyo hufnaanta uu muujiyay Garsoore Cumar, isaga oo noqday astaan dhiirrigelin u ah jiilka cusub ee Soomaaliyeed. Hambalyo Cumar, guulo kale oo taariikhdeenna qayb ka noqda ayaan kuu rajeynayaa," ayuu yiri Madaxweyne Xasan Sheekh.

Cumar Cartan ayaa si kooban uga falceliyay warka, isaga oo boggiisa Facebook ku qoray “Alhamdulillah,” taas oo muujisay farxaddiisa iyo mahadnaqiisa.

Xulashadan ayaa timid kaddib guulo isdaba joog ah oo Cartan gaaray, kuwaas oo ay ka mid yihiin inuu noqday garsoorihii ugu horreeyay ee Soomaali ah ee maamula final heer qaaradeed oo ay qabanqaabiso Confederation of African Football, inuu garsoore ka noqdo tartanka Africa Cup of Nations, isla markaana loo magacaabo Garsooraha Ragga ee Sanadka ee CAF 2025.

Cumar Cartan oo ku dhashay magaalada Mogadishu xilligii dagaallada sokeeye, ayaa kasoo dhex baxay horyaallada maxalliga ah inkastoo ay jireen caqabado badan. Sannadkii 2018 ayuu ku biiray liiska garsoorayaasha caalamiga ah ee FIFA, taas oo u sahashay inuu gaaro heerarka ugu sarreeya ee ciyaaraha.

GAROWE ONLINE