Goorma ayay DFS la wareegaysa Maamulka Hawada? [Dhageyso]
-
- Posted On 29-08-2017, 05:43PM
MUQDISHU, Somalia - Dowladda Federaalka ee Somalia ayaa shaaciyay in dhamaadka bisha October ee sanadkan ay si rasmi ah ula waraagi doonto maamulka Hawada, oo mudo ka badan 20 sano ay QM maamulaysay.
Dhaqaalaha laga qaado Diyaaradaha Isticmaalla Hawada Somalia waxaa intii uu dalka ku jiray burburka qaadaysay hay’adda ICAO ee duulista rayidka Qaramada Midoobay oo Xafiis ku leh magaalada Nairobi.
Maxamed Cabdullaahi Salaad “Oomaar”, Wasiirka Gaadiidka Cirka iyo dhulka ayaa waraysi uu siiyey VOA ku sheegay in la xiri doono xafiiska ICAO ee Nairobi, markii ay dowladda la wareegto maamulka Hawada.
Wasiirka ayaa intaasi raaciyay in Garoonka Aadan Cadde ay keeneen qalab dhamaystiran oo lagu maamulo hawada dalka, kaasi oo ay maamuli doonta dowladda Federaalka Somalia.
Wuxuu sheegay in Shaqaalaha Ajnabiga ah lagu bedeli doono kuwa Somali ah, markii uu dhamaado Heshiiskooda shaqo, si dhalinyarad Soomaaliyeed ee waxbartey loo siiyo fursado shaqo gudaha dalka.
Tallaabadan ayaa imaanaysa xilli dowladdii hore ee uu Madaxweynaha ka ahaa Xasan Sheekh ay wadahadal ku saabsan Maamulka Hawada la gashay Somaliland, oo sheeganaysa inay ka go'day Somalia 1991-dii.
GAROWEONLINE
