Hawlgallo ka Dhacay Hiiraan iyo Shabeellaha Dhexe

Muqdisho, Soomaaliya — Dowladda Soomaaliya ayaa sheegtay in ciidamada ammaanka ay dileen 16 dagaalyahan oo ka tirsan Al-Shabaab kaddib hawlgallo milatari oo laga sameeyay gobollada Hiiraan iyo Shabeellaha Dhexe.

War ka soo baxay Hay’adda Sirdoonka iyo Nabad Sugidda Qaranka (NISA) ayaa lagu sheegay in hawlgallada lagu bartilmaameedsaday xubno ka tirsan Al-Shabaab oo ku sugnaa deegaanno ka tirsan labada gobol.

NISA ma aysan shaacin faahfaahin dheeraad ah oo ku saabsan goobaha saxda ah ee hawlgalladu ka dhaceen iyo khasaaraha soo gaaray dhinacyada kale.

Hiiraan iyo Shabeellaha Dhexe ayaa ka mid ah gobollada ay ka socdaan howlgallada ka dhanka ah Al-Shabaab, iyadoo ciidamada dowladda iyo kuwa deegaanka ay wadaan dadaallo lagu doonayo in lagu yareeyo awoodda kooxda.

Dowladda Federaalka Soomaaliya ayaa sheegtay inay sii wadi doonto howlgallada milatari ee ka dhanka ah Al-Shabaab, iyadoo kaashanaysa ciidamada deegaanka iyo saaxiibada caalamiga ah.

GAROWE ONLINE