Jadwalka cusub ee doorashooyinka oo khatar gelinaya wada-hadallada dowladda iyo mucaaradka

MUQDISHO — Guddiga Madaxa-bannaan ee Doorashooyinka iyo Xuduudaha (NIEBC) ayaa ku dhowaaqay jadwal hordhac ah oo ku saabsan doorashooyinka heer federaal iyo heer dowlad-goboleed ee 2026-ka.

Tallaabadan ayaa ku soo aadaysa xilli xasaasi ah, waxayna dad badan rumeysan yihiin inay carqalad ku noqon karto wada-hadallada uu Madaxweyne Xasan Sheekh Maxamuud isugu yeeray dhinacyada siyaasadda.

Jadwalka Doorashooyinka ee la soo saaray:

Dowlad Goboleedka Koonfur Galbeed: Waxaa loo qorsheeyay inay noqoto meesha ugu horreysa ee ay doorashadu ka bilaabato 10-ka May 2026, iyadoo doorashada madaxweynuhuna ay dhacayso 23-ka May 2026.

Galmudug iyo Hirshabelle: Doorashooyinka heer degmo iyo kuwa baarlaman ayaa loo qorsheeyay 20-ka June, halka doorashada madaxweynaha labadaas maamul ay dhacayso 9-ka Luulyo 2026.

Gobolka Banaadir: Doorashada goleyaasha deegaanka ayaa loo qorsheeyay 30-ka Luulyo, halka doorashada Duqa Muqdisho iyo ku-xigeenkiisa ay dhacayso 5-ta Agoosto 2026.

Jubbaland iyo Gedo: Gobolka Gedo ayaa jadwalka lagu daray in doorashada golaha deegaanka ay ka dhacdo 30-ka Luulyo, taas oo loo arko tallaabo sii hurin karta khilaafka kala dhexeeya maamulka Kismaayo.

Wada-hadallada May 10 iyo Mowqifka Mucaaradka

Madaxweyne Xasan Sheekh Maxamuud ayaa horey isugu yeeray isbahaysiga mucaaradka ee "Somalia's Future Council" si ay uga qayb galaan wada-hadallo dhacaya 10-ka May, kuwaas oo looga hadlayo mustaqbalka doorashooyinka dalka.

Hase yeeshee, dhowaqaan cusub ee guddiga doorashooyinka ayaa abuuray shaki iyo xiisad hor leh. Mucaaradka ayaa horey u sheegay inaysan aqoonsan doonin madaxweynaha wixii ka dambeeya 15-ka May, markaas oo uu ku eg-yahay muddo-xileedka dastuuriga ah ee afar-sano ah, iyagoo ku eedeeyay dowladda inay si keligiis-talisnimo ah u go’aamineyso masiirka doorashada.

Saamaynta Caalamiga ah

In kasta oo beesha caalamka, oo ay ka mid yihiin Qaramada Midoobay, UK, iyo Midowga Yurub, ay soo dhoweeyeen baaqii wada-hadalka ee madaxweynaha, haddana jadwalkan cusub ayaa loo arkaa mid meesha ka saaraya ujeedkii wada-hadallada, maadaama guddigu uu go’aamiyay waqtigii doorashada ka hor inta aan heshiis laga gaarin hannaanka loo marayo.

Khubarada siyaasadda ayaa aaminsan in tallaabadan NIEBC ay u muuqato mid lagu xoojinayo qorshaha dowladda, balse ay sii fogeynayso rajadii laga qabay in tanaasul iyo is-faham laga gaaro doorashooyinka dalka ee 2026-ka.

GAROWE ONLINE