Jubaland oo digniin ka bixisay faragelinta Dowladda Federaalka ee nidaamka federaalka

MUQDISHO – Maamulka Jubbaland ayaa ku eedeeyay Dowladda Federaalka Soomaaliya faragelin aan waafaqsanayn dastuurka arrimaha dowlad goboleedyada, iyaga oo ku digay in tallaabooyinkaas khatar gelinayaan nidaamka federaalka iyo midnimada dalka.

War-saxaafadeed ka soo baxay Madaxtooyada Jubbaland ayaa lagu sheegay in Dowladda Federaalka aysan awood u lahayn inay si keligeed ah wax uga beddesho Dastuurka ama dib-u-habayn ku samayso nidaamka maamul, iyaga oo xusay in jiritaanka dowladnimada Soomaaliya ku dhisan tahay heshiis wadajir ah, oo aanay ku xirnayn rabitaanka hal xisbi ama qof siyaasadeed.

“Habka federaalka wuxuu ku dhisan yahay heshiis iyo go’aan wadajir ah,” ayaa lagu yiri war-saxaafadda, iyadoo lagu adkeeyay in hay’ad kasta aysan awood u lahayn inay keligeed go’aamiso mustaqbalka nidaamka federaalka.

Jubbaland ayaa ku eedeeyay Muqdisho inay wiiqayso heshiisyada saldhig u ah Jamhuuriyadda Federaalka Soomaaliya, iyada oo sheegtay in dowladda ay isku dayayso inay daciifiso maamulada goboleedyada iyada oo adeegsanaysa tallaabooyin siyaasadeed iyo kuwo sharci-darro ah.

War-saxaafaddu waxay digniin ka bixisay in tallaabooyinkaas khatar weyn ku yihiin midnimada iyo xasilloonida Soomaaliya, isla markaana ay qoto-dheeri karaan kala qaybsanaanta siyaasadeed xilli xasaasi ah.

Maamulka Jubbaland ayaa ku adkeeyay in ay ka go’an tahay difaaca midnimada dalka, ilaalinta Dastuurka, iyo xaqiijinta xuquuqda dastuuriga ah ee dowlad goboleedyada xubnaha ka ah federaalka. Waxa kale oo ay ugu baaqday shacabka Soomaaliyeed inay ka digtoonaadaan tallaabooyinka keeni kara kala qaybsanaan iyo fowdo siyaasadeed.

War-saxaafaddu waxay sidoo kale xustay in khilaafaadka siyaasadeed lagu xallin karo wada-xaajood, ixtiraam wadajir ah, iyo u hogaansanaan Dastuurka lagu heshiiyey, iyadoo si adag u diiday tallaabooyin keligeed ah oo lagu wiiqayo nidaamka federaalka.

Eedeyntan ayaa imaanaysa iyadoo labada aqal ee Baarlamaanka Soomaaliya Sabtidii ka doodayeen wax ka beddel lagu sameynayo Dastuurka KMG, gaar ahaan qodobo muhiim u ah federaalka iyo wadaagga awoodda.

Intii lagu guda jiray fadhiga wadajirka ah, xildhibaanadu waxay dib u eegis ku sameeyeen Cutubka Afaraad ee wax-ka-beddelada la soo jeediyey, waxayna ka doodeen qodobbada 49, 50 iyo 54, kuwaas oo qeexaya qaab-dhismeedka federaalka, xiriirka u dhexeeya Dowladda Federaalka iyo dowlad goboleedyada, iyo qaybsiga awoodaha.

Habka dib-u-eegista dastuurka ayaa dhalisay khilaaf weyn oo u dhexeeya Dowladda Federaalka iyo qaar ka mid ah dowlad goboleedyada, iyadoo dhaliiluhu ka digayaan in wax ka beddelka la soo jeediyey uu saameyn ku yeelan karo miisaanka awoodaha ee nidaamka federaalka ee daciifka ah ee Soomaaliya.

GAROWE ONLINE