Jubaland oo Mahadnaq U Jeedisay Kenya Doorkeeda Dhex-dhexaadinta Wadahadallada Dowladda Federaalka

KISMAAYO, Soomaaliya — Maamulka Jubaland ayaa si rasmi ah ugu mahadceliyay Dowladda Kenya doorkeeda lagu tilmaamay “mid wax dhisaya” oo ay ku leedahay fududeynta iyo dhexdhexaadinta wadahadallada siyaasadeed ee u dhexeeya Jubaland iyo Dowladda Federaalka ee Soomaaliya, kadib markii ay dhammaadeen wadahadallo heer sare ah oo ka dhacay magaalada dekedda leh ee Kismaayo — inkastoo aysan wax natiijo rasmi ah laga gaarin.

War-saxaafadeed kasoo baxay Madaxtooyada Jubaland ayaa lagu bogaadiyay dadaallada Kenya, iyadoo lagu xusay in Jubaland ay sidoo kale garowsan tahay kaalinta ay ku leedahay beesha caalamka iyo dalalka gobolka ee taageeraya dadaallada lagu xallinayo khilaafaadka siyaasadeed ee dalka ka taagan.

“Maamulka Jubaland wuxuu si gaar ah ugu mahadcelinayaa Dowladda Kenya iyo saaxiibada kale ee caalamiga ah, doorkooda fududeynta iyo dhiirrigelinta wadahadallada muhiimka ah,” ayaa lagu yiri bayaanka Jubaland.

Inkastoo kulankani loo arkay fursad dhif ah oo lagu muujinayo is-dhexgal siyaasadeed oo toos ah oo u dhexeeya Kismaayo iyo Muqdisho, haddana hadallada si taxaddar leh loo dhigay iyo ka-gaabsiga magaca Madaxweynaha Soomaaliya ee war-murtiyeedka rasmiga ah waxay muujinayaan sida uu wali u jilicsan yahay xiriirka labada dhinac.

Falanqeeyeyaasha siyaasadeed ayaa tilmaamaya in tallaabadani ay astaan u noqon karto kalsooni darro taaganFalanqeeyeyaasha siyaasadeed ayaa tilmaamaya in tallaabadani ay astaan u noqon karto kalsooni darro taagan iyo in aysan jirin wax horumar muuqda oo laga sameeyay qodobbada ugu muhiimsan sida awood qaybsiga, dib u eegista dastuurka, iyo arrimaha madaxbannaanida maamul goboleedyada.

Madaxweynaha Jubaland, Axmed Maxamed Islaam (Axmed Madoobe), ayaa ku celiyay sida ay maamulkoodu uga go’an tahay in lagu dhameeyo khilaafaadka dalka iyadoo la adeegsanayo wadahadal iyo is-afgarad. Wuxuu sidoo kale shacabka Jubaland uga mahadceliyay sida ay u garab taagan yihiin maamulkooda iyo u hoggaansanaanta mabaadi’da siyaasadeed ee ay aaminsan yihiin.

Labada dhinac ayaa la sheegay inay ku heshiiyeen in wadahadallada la sii wado toddobaadyada soo socda, si kalsooni lagu dhiso iyo in la helo xalka qodobbada muranka dhaliyay ee qaran.

Kenya oo xuduud dheer la leh Jubaland, isla markaana door muuqda ku lahayd dadaallada nabadeynta Soomaaliya tan iyo markii ay bilowdeen, ayaa markale u muuqata in ay tahay xubin muhiim ah oo kaalin firfircoon ku leh dhexdhexaadinta xilligan siyaasadeed ee xasaasiga ah.

GAROWE ONLINE