Madaxweynaha Galmudug oo ka hadlay Dilka Gudoomiyihii Galgaduud
-
- Posted On 05-08-2017, 11:25AM
CADAADO, Somalia - Madaxweynaha Galmudug Axmed Ducaalle Geelle (Xaaf), ayaa ka hadlay Dilkii xalay Muqdishu loogu geestay Gudoomihii gobolka Galgaduud Maxamed Daahir Cali, iyo Walaalkiisa Xasan Cali.
Madaxweyne Xaaf ayaa ugu baaqay dowladda Federaalka inay gacanta ku soo dhigto gacan ku dhiiglayaashii ka dambeeyay dilka Gudoomiyihii Gobolka Galgaduud iyo Walaalkiisa, oo Koox hubaysan ku toogteen Xaafada Carafaat ee degmada Yaaqshiid.
War kasoo baxay Xafiiska Xaaf ayaa lagu sheegay in Galmudug ay dalbanayso baaritaan in lagu sameeyo kiiskaasi dilka ah, kadibna gacanta lagu soo dhigo dadka dilka gaystay islamarkaana Cadaaladda la horkeenno dhagar-qabiyaashaasi caadaystay dilka dadka indhaha u ah umadda.
Dowladda Federaalka wali kama aysan hadlin dilka Gudoomiyaha Galgaduud.
Al Shabaab ayaa sheegatay Mas'uuliyadda dilkaMaxamed Daahir Cilmi iyo Xasan Daahir Cilmi oo labaduba lagu dilay Xaafada Carafaat iyadoo halkaasi ku booqanayay Aabahooda oo xanuunsan.
Gaariga Gudoomiyaha ayaa lagu horjaray gaari kale ay saarnaayeen dabley hubaysan, kadibna toogtey Marxuumka iyo Walalkiisa oo ahaa Nin Injineer ah, sida ay Goobjoogiyaasha xaqiijiyeen. Gudoomiyaha ma wadin wax ilaalo ah xilliga la dilayay.
GAROWEONLINE
