Mareykanka oo Ammaanay Guusha Puntland ka gaartay Dagaalka Daacish

MUQDISHO, Sebtembar 5, 2025 – Taliyaha cusub ee Ciidamada Mareykanka ee Afrika (AFRICOM), Jenaraal Dagvin Anderson, ayaa si weyn u ammaanay maamulka Puntland ee Soomaaliya, isagoo sheegay in guulo la taaban karo laga gaaray dagaalka lagula jiro kooxaha xagjirka ah.

Jenaraal Anderson oo la hadlay warbaahinta ayaa sheegay:

“Waxaanu la shaqaynay Puntland, annagoo siinay xog sirdoon, bartilmaameedyo iyo duqaymo; balse Soomaalida [Puntland] ayaa qaaday mas’uuliyadda dhulka, isla markaana keenay guul muuqata oo taaban karta.”

Hadalkan ayaa imaanaya xilli ciidamada ammaanka Puntland ay wadaan hawlgallo xooggan oo ka dhan ah kooxda Daacish iyo Al-Shabaab, gaar ahaan buuraha Galgala iyo agagaarka gobolka Bari.

Taliyaha Mareykanka ayaa caddeeyay in doorka ay Puntland ka qaadatay hawlgallada ay tusaale u tahay sida iskaashi dhab ah oo u dhexeeya saaxiibbada caalamiga ah iyo ciidamada maxalliga ahi u dhalin karaan natiijooyin muuqda.

Iskaashi Sirdoon iyo Duqeymaha

Jenaraal Anderson wuxuu sheegay in Mareykanku uu bixiyay:

Xog sirdoon oo muhiim ah
Bartilmaameedyo istaraatiiji ah
Taageero duqeymo

Hase yeeshee wuxuu xusay in guusha ugu weyn ay ahayd doorka Puntland ee dhinaca ciidanka dhulka, oo horseeday in la jabiyo kooxda hubeysan.

Guulo Taaban Kara iyo Tusaale u ah dowladda Soomaaliya

Taliyaha AFRICOM wuxuu Puntland ku tilmaamay "tusaale muujinaya awoodda Soomaalida marka ay helaan taageero sax ah iyo madax bannaani hawlgaleed."

Puntland ayaa horey u sheegtay inay dileen saraakiil sare oo ka tirsan kooxaha argagixisada, isla markaana ay gacanta ku dhigeen hub iyo qaraxyo ay kooxahaasi diyaarinayeen.

Dowladda Federaalka iyo Dowlad-Goboleedyada oo Lagu Baaqay Iskaashi Dheeraad ah

Mareykanka ayaa ugu baaqay Dowladda Federaalka iyo dowlad-goboleedyada kale in ay qaataan hab la mid ah midka Puntland, si loo helo nabad waarta iyo argagixiso la’aan guud ahaan Soomaaliya.

GAROWE ONLINE