Masar oo Diyaarado Dagaal u Direysa Soomaaliya, Loollanka quwadaha Caalamka oo Cirka Isku Shareeray

Qaahira — Warbaahinta gudaha Masar ayaa ku warrantay in Madaxweynaha Masar, Cabdulfataax Al-Siisi, uu qorsheynayo inuu diyaarado dagaal u diro Soomaaliya, tallaabo muujinaysa loollan sii xoogeysanaya oo quwadaha caalamka ay ku hayaan gudaha dalka.

Maalin kahor, Madaxweyne Xasan Sheekh ayaa goobjoog u ahaa Ciidamo Masar usoo dirayso Soomaaliya, oo dhoolatus ka sameeyay gudaha Masar, iyadoo lagu soo bandhigay goobta gaadiidka dagaalka gaashaaman.

Soomaaliya ayaa hadda u muuqata goob ay si toos ah ugu tartamayaan dalal awood leh, arrintaas oo sare u qaadaysa suurtagalnimada in dalka uu noqdo meel uu ka qarxo dagaal wakiillo (proxy war) ah.

Turkiga ayaa horey Soomaaliya ugu soo daabulay diyaarado dagaal iyo hub culus, halka Itoobiya ay kumannaan askari ka joogaan gudaha dalka. Sidoo kale, warar soo baxaya ayaa sheegaya in Israa’iil ay daneynayso inay saldhigyo ciidan ka sameysato magaalada Berbera.

Falanqeeyayaal ayaa ka digaya in is biirsiga arrimahan uu horseedi karo xiisad amni oo ballaaran, taasoo ku fidi karta Soomaaliya iyo marin-biyoodka istaraatiijiga ah ee Badda Cas iyo Gacanka Cadmeed, oo muhiim u ah ganacsiga iyo amniga caalamka.

GAROWE ONLINE