Mucaaradka Soomaaliya Oo Sharci-darro Ku Tilmaamay Guddiga Doorashada Guddoomiyaha Baarlamaanka

MUQDISHO – Xildhibaanno ka tirsan mucaaradka Soomaaliya ayaa si adag u diiday magacaabista guddi loo xil saaray qabanqaabada doorashada Guddoomiyaha Golaha Shacabka, iyagoo ku dooday in tallaabadaasi aysan lahayn saldhig sharci maadaama muddo-xileedka Baarlamaanka Federaalka iyo dowladda ku-meel-gaarka ah ee hadda jirta uu dhammaaday.

War-saxaafadeed ay si wadajir ah u soo saareen fiidnimadii Axadda ayay xildhibaannadu ku sheegeen in magacaabista guddiga ay ka hor imaaneyso sharciga, isla markaana aysan jirin awood dastuuri ah oo lagu dhisi karo guddiga xilligan.

Mucaaradku waxay sidoo kale ku eedeeyeen xisbiga talada haya ee Cadaaladda iyo Wadajirka (JSP) inuu adeegsanayo hay'adaha dowladda si uu u maamulo una saameeyo hannaanka doorashada Guddoomiyaha Golaha Shacabka.

Waxay ka digeen in go'aankaasi uu sii xoojin karo khilaafka siyaasadeed ee dalka, isla markaana wiiqi karo nidaamka federaalka iyo kalsoonida lagu qabo geeddi-socodka siyaasadeed.

War-saxaafadeedka ayaa kusoo beegmaya iyadoo dalka uu ka taagan yahay muran la xiriira sharciyadda hay'adaha dowladda iyo hannaanka doorashooyinka, iyadoo mucaaradku ay ku baaqayaan in xal siyaasadeed oo loo dhan yahay laga gaaro xaaladda jirta.

GAROWE ONLINE