Muqdishu: Qalabka lagula soconayo Hawada Somalia oo Rakibaadiisu bilaabatay
-
- Posted On 12-07-2017, 11:32AM
MUQDISHU, Somalia- Dowladda Somalia, ayaa muddo 27 sano ah kadib la wareegi doonta maamulka hawadeeda kadib markii magaalada Muqdishu la keenay Qalab casri ah oo lagula soconayo dhaq-dhaqaaqa isticmaalka hawada dalka.
Xarunta hay'adda Saadaasha iyo Duuliista hawada Somalia, ayaa qalabkan oo dhawaan laga keenay dalka Kenya lagu rakibayaa, waxaana xukuumaddu muujisay rajo wanaagsan iyo tallaabo horay loo qaaday.
Wasiirka Wasaaradda Duuliista hawada Somalia, Maxamed Cabdullaahi Oomaar oo warbaahinta kula hadlayay goobta qalabkaasi lagu rakibayo ayaa sheegay in dhawaan lasoo gaba gabayn doono shaqada qalabkaasi lagu rakibayo.
Oomaar ayaa xusay in qalabkan uu yahay mid Casri ah oo saamaxaya in dowladdu si Madax bannaan u maamusho hawadeeda.
Hey’ad hoos timaada Qaramada Midoobey oo lagu magacaabo ICAO, ayaa maamuleysay hawada Somalia tan iyo bur burkii dowladdii dhexe.
Dadaalada lagusoo wareejiyay qalabkan ayaa soo socday muddo dheer.
Qaar kamid ah shacabka Somaliyeed ayaa soo dhaweeyay tallaabadaas iyagoo muujiyay inay soo ifbaxday rajo dowladnimo iyo in markale Somalia u madax-bannaanaato arrimaheeda.
GAROWEONLINE
