Nin Soomaali ah oo weerar mindi ku qaaday laba nin oo Yuhuud ah London

LONDON — Nin 45 jir ah oo asal ahaan ka soo jeeda Soomaaliya, isla markaana haysta dhalashada Britain, ayaa weerar mindi ah ku qaaday laba nin oo Yuhuud ah waqooyiga magaalada London, sida ay boolisku sheegeen Khamiistii, iyagoo dhacdadan u arka fal argagixiso oo lagu bartilmaameedsaday bulshada Yuhuudda.

Weerarka ayaa ka dhacay xaafadda Golders Green, oo ay ku badan yihiin dadka Yuhuudda ah. Labada nin ee la weeraray, oo kala ah 76 jir iyo 34 jir, ayaa la dhigay isbitaal, iyadoo la sheegay in xaaladdoodu ay deggan tahay.

Booliska magaalada London ayaa sheegay in askartu ay adeegsadeen qalabka korontada lagu suuxiyo (Taser) si ay u qabtaan tuhmanaha, kadib markii uu isku dayay inuu weeraro ciidamo boolis ah oo goobta gaaray.

Taliyaha booliska London, Mark Rowley, ayaa sheegay in baaritaannada hordhaca ah ay muujinayaan in tuhmanuhu uu ku lug lahaa dhacdo kale oo rabshad wadata oo isla maalintaas ka dhacday koonfur-bari London, taasoo qof kale uu ka soo gaaray dhaawac fudud.

Warbaahinta BBC ayaa sheegtay in ninka la hayo uu yahay Essa Suleiman, 45 jir, oo degan koonfur-bari London. Waxaa la sheegay inuu ku dhashay Soomaaliya, balse uu u soo guuray Britain isagoo carruur ah horaantii sagaashamaadkii, islamarkaana uu si sharci ah ku joogo dalka isla markaana yahay muwaadin British ah.

Mark Rowley ayaa intaas ku daray in tuhmanaha uu horey u lahaa taariikh rabshado culus iyo dhibaatooyin dhinaca caafimaadka maskaxda ah, inkastoo faahfaahin dheeraad ah aan weli la shaacin.

Dhacdadan ayaa ku soo beegmaysa xilli ay sii kordhayaan weerarrada naceybka ku saleysan ee ka dhanka ah Yuhuudda ee gudaha Boqortooyada Midowday, taasoo sare u qaadday walaaca laga qabo ammaanka bulshadaas.

Ra’iisul wasaaraha Israa’iil, Benjamin Netanyahu, iyo hoggaamiyeyaal kale ayaa ku baaqay in si degdeg ah loo xoojiyo tallaabooyinka lagu ilaalinayo bulshada Yuhuudda ah ee dibadda ku nool.

Dowladda Britain ayaa dhankeeda sheegtay inay kordhin doonto dadaallada lagu sugayo ammaanka guud, halka qaar ka mid ah dadka goobta ku sugnaa ay muujiyeen caro, iyagoo ku eedeeyay booliska inay ku guuldareysteen ilaalinta bulshada nugul.

Baaritaannada ayaa weli socda.

GAROWE ONLINE